Тав сана1

Тав сана

П.Хусанкая

Кам тӳссе ирттерчĕ çынпа тан,

Кам ырра усал теме хăймарĕ,

Усала айваннăн пуç таймарĕ,

Çав калатăр пĕтĕм кăмăлтан:

Çамрăк ĕмĕр харăма каймарĕ!

Пултаруллă тусăм, Тав сана!

Эп кунта вун çичĕ çул пулмарăм,

Пуласса та, ахăртнех, сунмарăм,

Анчах сан тивлетлĕ сăнарна

Чĕрĕ хальлĕн чĕремре упрарăм.

Вăй параттăн — ывăнса çитсен,

Сас параттăн — шухăша кайсассăн,

Е хĕвеллĕ çумăр пек ачашшăн

Ислететтĕн чун типсе килсен...

Ахаль мар эп тайăлса каласшăн:

Чăвашсен пĕр лайăх сăмах пур —

Юлташ пултăр хăвăнтан маттур!