«Тĕлĕк-и поэзи, тĕлĕк мар-и…»

Валери Туркай | Сăвă | 2021 | тĕлĕк | 689


«Поэзи — тĕлĕк».

Илтнинчен.

 

Тĕлĕк-и поэзи, тĕлĕк мар-и,

Тĕлĕкрен нимпе те кая мар!

Хĕвеле ним мар эс ыталатăн,

Тултарсан вăл сан чунна кăвар.

 

Кайăкран та лайăхрах юрлатăн

Эс, — лексессĕн унăн ытамне,

Сăвă кăмăлна тыткăнласассăн,

Чăл та пар вататăн чулсене.

 

Тĕлĕк-и поэзи?.. Тĕлĕк!.. Тĕлĕк!..

Хăш чухне тутли те çук унран.

Эмелрен те пахарах сиплет вăл

Санăн суранна, — эс амансан.

 

Шел, пурне те курăнмасть çак тĕлĕк —

Çак телей, асамлă çак юмах...

Сан чуну мăкланнă чул пулсассăн,

Кураймастăн эс ăна, паллах.

 

Тĕлĕк-и поэзи, тĕлĕк мар-и,

Тĕлĕкрен нимпе те кая мар!

Хĕвеле ним мар эс ыталатăн,

Тултарсан вăл сан чунна кăвар.

 

16.07.21

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем