Çичĕ çын валли

Анатолий Васильев | Сăвă | 1 317


Эпĕ мĕн çырни

манран тухать –

шутлани çинчен

çыратăп.

Кашни сăмах

тӳрĕ пăхать –

кайма çулне

хамах паратăп.

Тĕрĕслесе мана

хĕсмеççĕ,

мĕншĕн ун пек çыран

темеççĕ,

мана укçа та

тӳлемеççĕ,

нумайăшĕ

мана пĕлмеççĕ...

 

Пурăннă чух ман

çырмалла,

сăмса çĕклесе

çырмастăп.

Мĕн панине

пурăнмалла,

чуххăм та чаххăм

пурăнмастăп.

Çĕре çити эп

авăнман,

нихçан та эпĕ

парăнман,

кивçен илсе те

пурăнман,

хамăн ята та

варламан.

 

Пĕр ăслă çын

мана каларĕ:

«Çичĕ çын

сана пĕлсен,

сан сăвăсен

çирĕп тымарĕ

типмест кайран та –

эс вилсен,

эх, тытăнаççĕ

вулама,

сăвăсене

паллă лартма,

пичетлесе те

кăларма,

санăн ятран

укçа тума».

 

Манăн сăвăсене

вулаççĕ,

канаш парса та

пулăшаççĕ –

Ку вăл мана

савăнтарать,

сăвă çырма та

вăй парать.

Пурнăç çине

савса пăхсан,

унăн çутăлăхне

курсан,

сана вăй

паракан пулсан –

мĕнле лайăх

шăпа вăл сан!

 

Мăнаçлă шухăш

вăл çĕклет,

шутланă ĕмĕте

вĕçлет.

Апла пулсан,

ма ĕçлес мар,

наянланса

ĕçсĕр ан лар!

Çапла хама

хăваласа,

пурнăç çине

витĕр пăхса,

хама хам

мăнаçлантарса –

пурăнмалла халь

савăнса.

 

Пĕри мĕн виличчен

ĕçлет,

тепри ĕçсе

кунне вĕçлет.

Пурнăç нихçан та

çăмăл мар.

Турăçăм, пире

вăй пар!

Пирĕн кунта

пурăнмалла,

вăй пур таран

ĕç тумалла.

Çич çын валли

ман çырмалла,

таса йĕрсем

хăвармалла.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: