Электронлă вулавăш

Темĕн чухлĕ юрламан ман юрă

Чĕрере, савни пек, пурăнать.

Хăшĕ вĕсенчен çут тĕнче курĕ,

Хăшĕ юрланмасăр пытанать.

Вĕсенчен чылайăшĕ хаваслă,

Тунсăхли те, тусăм, сахал мар.

Хурлăхлă юрри калать: «Эп — аслă!

Чи малтан мана, тет, асăнар!»

Мĕншĕн-ха çапла хаваслă юрă

Пытанать, ав, ыттисем хыçне.

Çумăр евĕр тунсăх юрри çурĕ

Тасатас тесе çын хуйхине.

Хурлăхли вара, чăнах та, аслă,

Итлемест нихçан та никама,

Чĕререн тухать тарса каяслăн,

Тăвăл кăларса хуçаланать.

Хурлă юрă мĕншĕн-ха юрлатпăр,

Мĕншĕн макăртатпăр тăвана?

Чăннине паян эпир калатпăр:

Ку юрра юрлать çак самана.

23.03.2007.