Мăшăр тени мĕн тени

Мăшăр тени мĕн тени, —

Çумра арçын пур тени.

Юратупа пĕрлешсе

Пĕр çăмхана явăнни,

Пĕрне-пĕри итлесе

Килĕштерсе пурăнни.

Мăшăр тени мĕн тени, —

Çумра хӳтлĕх пур тени.

Ĕшенсессĕн тайăнма

Юман вырăнне пулни,

Ăшшăн тытнă ытамра

Ачашланма май пурри.

Мăшăр тени мĕн тени, —

Çумра шанчăк пур тени.

Çирĕп сывлăхлă пулса

Ăрăва вăй-хал пани,

Çут пуласлăха курса

Хавасланса пурăнни.

Мăшăр тени мĕн тени, —

Çумра ырлăх пур тени.

Ватлăхра та киленсе

Пурнăçа хыт юратни.

Ачасене ӳстерсе

Пĕрле ĕмĕр вĕçлени.

Çĕнĕ комментари хуш