Урхамахпа юланутçă

Порфирий Афанасьев | Сăвă | 1 270


«Черный крнь умирает на белом снегу.„»

К. Кулиев

 

Çĕр салтак,

Пин салтак,

Рет те рет...

Сар тусан

Хыçалта

Вĕçтерет.

 

«Малалла!

Малалла!» —

Тет трубач.

Ыткăнать

Тăвалла

Юрăпа:

 

«Ыткăнах.

Вирхĕнех,

Урхамах,

Санпа ман

Пĕр тĕллев,

Пĕр сăмах.

 

Санпа эпĕр

Хисеплĕ

Ретре,

Пулас тетпĕр

Ялан

Ирĕкре.

 

Санпа манăн

Тăшман халь

Пĕрре —

Таптаса

Ирсе кай

Ирсĕре!

 

Вĕçтерех,

Вĕçтерех,

Вĕçтерех,

Эп çĕклем

Ялава

Çӳлерех.

 

Вĕçтерех,

Анчах çул-йĕр

Тăрук

Татăлсан,

Çăлтăр евĕр куççулĕ

Типмесĕр юлсан, —

 

Пĕл: санпа эпĕр

Иккĕн

Нихçан парăнман.

Пĕл: санпа эпĕр

Вирлĕн

Кĕрешнĕ ялан.

 

Пĕл: санпа эпĕр

Çулнă

Хĕнпе хурлăха.

Пĕл: санпа эпĕр

Çăлнă

Тăван халăха».

 

...Çĕр салтак,

Пин салтак —

Рет те рет...

Сар тусан

Хыçалта

Вĕçтерет.

 

Чим, мĕн пулчĕ?

Трубач...

Сасна пăр!

Эй, хăюллăн,

Трубач,

Янраттар!

 

Анчах çук...

Ĕнтĕ

Чĕмсĕр

Трубач...

Юнпа витĕнчĕ

Ешĕл

Хупах.

«Эх, ыр тусăм,

Хура урхамах,

Калаçасшăнччĕ —

Пĕтрĕ сăмах.

Вирхĕнесшĕнччĕ

Çĕнĕ вăйпа,

Йыхăрасшăнччĕ —

Ӳкрĕ труба.

Ав килет çывхарса

Шурăмпуç.

Эх, курасчĕ те, —

Хупăнчĕ куç.

Пулинех!

Эпĕр иккĕн

Нихçан

Парăнман.

Сывă чух эпĕр

Вирлĕн

Кĕрешнĕ ялан.

Сывă чух

Эпĕр çулнă

Хĕнпе хурлăха.

Сывă чух

Эпĕр çăлнă

Тăван халăха!..»

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: