Тусай (выр. Досаево) — Чӑваш Республикин Красноармейски районӗнчи ял, вӑл Упи ял тӑрӑхне кӗрет.

Географи

Республикӑн тӗп хулине Шупашкара ҫитме 69 километр, район центрне, Красноармейски ялне, ҫитме — 11 километр, чи ҫывӑхри чукун ҫул станцине ҫитме — 23 километр.

Историйӗ

Яла 1964 ҫулхи акан 23-мӗшӗнче Ҫӗрпӳ районӗнчи Шӑмар-Тусай тата Чаттай-Тусай ялӗсене пӗрлештерсе ҫирӗплетнӗ. 1964 ҫултанпа 1965 ҫулччен ял Ҫӗрпӳ районне кӗнӗ, 1965 ҫултанпа вара Красноармейски районӗнче шутланать.

Халӑх йышӗ

Ялти халӑх йышӗ ҫулсемпе:

• 1979 ҫул — 198 кил, 550 ҫын.
• 2002 ҫул — 166 кил, 402 ҫын (193 арҫын, 209 хӗрарӑм).
• 2010 ҫул — 138 пайӑр кил хуҫалӑхӗ, 367 ҫын (187 арҫын, 180 хӗрарӑм).

Наци йышӗнче тӗпрен илсен чӑвашсемпе тутарсем пурӑнаҫҫӗ.

Инфраструктура тата экономика

Ял территорийӗнче «Досаево» ял хуҫалӑх эртелӗ (кооперативӗ) ӗҫлет. Тусай ялӗнче фельдшер пункчӗ, ял клубӗ, стадион тата икӗ лавкка пур.

Паллӑ ҫынсем

Тусай ялӗпе ҫак паллӑ ҫынсен пурнӑҫӗпе ӗҫ-хӗлӗ ҫыхӑннӑ:

• Андреев Иван Михайлович (1948 ҫ.ҫ.) — тухтӑр, медицина ӑслӑлӑхӗсен кандидачӗ.
• Деменцова Роза Трофимовна (1961 ҫ.ҫ.) — журналист, Раҫҫейри Журналистсен пӗрлӗхӗн членӗ.
• Ефимов Виталий Арсентьевич (1931 — 2018) — тухтӑр, медицина ӑслӑлӑхӗсен кандидачӗ.
• Журавлёв Василий Никитич (1941 — 1984) — производство йӗркелекенӗ.
• Матвеев Иван Матвеевич (1936 — 2019) — строитель.
• Налимов Юрий Александрович (1950 — 1999) — юрист, юстици полковникӗ.
• Семёнов Сергей Михайлович (1983 ҫ.ҫ.) — чӑваш эстрада юрӑҫи.