Ҫӗнӗ Лапсар (выр. Новые Лапсары) — Чӑваш Республикинчи Шупашкар хула округӗнчи посёлок. Унччен хула евӗрлӗ посёлок статуслӑ пулнӑ. Шупашкар хулин Ленин районне пӑхӑнса тӑрать.
Ҫӗнӗ Лапсар Шупашкар хулин кӑнтӑр чиккисенче, М7 «Атӑл» автомагистраль ҫывӑхӗнче вырнаҫнӑ. Посёлок лаптӑкӗ 30 гектар пулать.
Посёлока 1970 ҫулта йӗркеленӗ. 1979 ҫулта ӑна рабочисен посёлокӗн статусне панӑ. 1983 ҫулхи акан 20-мӗшӗнчи 406-р №-лӗ распоряженипе Ҫӗнӗ Лапсара Шупашкар хулин йышне кӗртнӗ.
1980-мӗш ҫулсенче посёлокра виҫӗ-пилӗк хутлӑ нумай хваттерлӗ пурӑнмалли ҫуртсем, ҫавӑн пекех социаллӑ-культура тата администраци ҫурчӗсене туса лартнӑ. 1997 ҫулхи ака уйӑхӗнче Шупашкар хулипе Шупашкар районӗн администрацийӗсем хушшинчи килӗшӳпе Ҫӗнӗ Лапсар посёлокне, унпа юнашар вырнаҫнӑ хӑш-пӗр ялсемпе пӗрле, Шупашкар хулин территорийӗпе чӑннипе пӗрлешсе кайнӑ пирки Чӑваш Республикин ял-хулисен списокӗнчен кӑларнӑ.
1990—2000 ҫулсенче Ҫӗнӗ Лапсарта Шупашкар агломерацийӗнчи ял-хуласен хушшинче халӑх йышӗ чи нумай ӳснӗ: ҫав вӑхӑтра унта пурӑнакансен йышӗ 1300 ҫын ӳснӗ.
Инҫе мар посёлока ят паракан Лапсар ялӗ, ҫавӑн пекех Ҫатракасси ялӗ вырнаҫнӑ, унта 1970-мӗш ҫулсен вӗҫӗнче Ҫӗнӗ Лапсар посёлокӗнче ҫӗнӗ вӑтам шкул туса лартнӑ хыҫҫӑн вырӑнти ял шкулӗн пӗлтерӗшӗ пӗчӗкленнӗ.
2010 ҫулхи Пӗтӗм Раҫҫейри халӑх ҫыравӗпе Ҫӗнӗ Лапсарта 6955 ҫын пурӑннӑ. Ӗҫлеме пултаракан халӑх пайӗ 71,3 % пулнӑ, ватӑ ҫынсен пайӗ — 14,5 %.
2010 ҫулхи ҫырав посёлокра пурӑнакансен наци составне ҫапла палӑртнӑ:
Ҫӗнӗ Лапсарӑн посёлока йӗркелекен предприятийӗ — чӑх-чӗп хапрӑкӗ. Посёлок территорийӗнче ҫавӑн пекех суту-илӳ тата пулӑшу предприятийӗсемпе склад ҫурчӗсем вырнаҫнӑ, йывӑҫпа ӗҫлекен производствӑсемпе транспорт предприятийӗсем ӗҫлеҫҫӗ.
Посёлокра ача пахчипе пӗрле пуҫламӑш шкул ӗҫлет. Ҫӗнӗ Лапсарта пурӑнакансем Совхоз урамӗнче вырнаҫнӑ Турӑ Амӑшӗн «Скоропослушница» турӑшӑн храмне ҫӳреҫҫӗ.
Шупашкар хулипе Ҫӗнӗ Лапсар посёлокӗ хушшинче тӑтӑш автобус ҫӳрет, вӑл 46-мӗш номерлӗ.
Статья каҫми :: Пичет версиӗ 
+12.3 °C