__Красноармейскинче__ Бавари Ҫӗрӗн Лапперсдорф общинин (районӗн) делегацийӗ пулса курчӗ.

Ун йышӗнче — 19-ӑн, ҫав шутра Эрих Доллингер бургомистр мӑшӑрӗпе — Йоханнапа тата Ханс Тодт альтбургомистр мӑшӑрӗпе — Каролинӑпа, ыттисем — община парламенчӗн депутачӗсем, хуҫалӑхсен, вӗрентӳ, культура, коммуналлӑ организацисен ертӳҫисем. Ҫулҫӳреве икӗ ен туслӑх кӗперне хывнӑранпа 20 ҫул ҫитнине халалланӑ.

Делегацине Трак вӑтам шкул вӗренекенӗсемпе вӗрентекенӗсем ҫӑкӑр-тӑварпа, чӑваш сӑрипе тата юрӑпа тарават кӗтсе илчӗҫ.

Шкул директорӗ, ЧР тава тивӗҫлӗ вӗрентекенӗ Г. Юлмасова вӗрентӳ учрежденийӗн ӗҫӗ-хӗлӗпе паллаштарчӗ. «Эпир чылай проекта пурнӑҫа кӗртессипе ӗҫлетпӗр, ҫав шутра нимӗҫ чӗлхине республикӑра анлӑрах сарас енӗпе те. Ку чӗлхене ачасем юратса вӗренеҫҫӗ, ҫӑмӑллӑнах калаҫма хӑнӑхаҫҫӗ. Пирӗн шкулта пӗлӳ илнӗ вунна яхӑн ҫамрӑк хӑйӗн пурнӑҫне Германипе ҫыхӑнтарнӑ. Ачасен пӗр ушкӑнӗ кӗҫех Англире ҫулҫӳревре пулса курать», — пӗлтерчӗ Галина Илларионовна.

Чӑваш апатне — хуран куклине — тутанса пӑхнӑ хыҫҫӑн инҫетри ҫывӑх туссем шкулпа паллашрӗҫ: пуҫламӑш классен пӳлӗмӗсене, этнопедагогика музейне кӗрсе курчӗҫ, «Ачасен Арбачӗн» ӗҫне хутшӑнчӗҫ, ачасене сувенирсем пачӗҫ.

__И.Я. Яковлев ячӗллӗ Чӑваш патшалӑх педагогика университечӗн__ профессорӗ Т.Н. Петрова Г. Юлмасова директора чӑваш халӑхне ҫутта кӑлараканӑн И.Я. Яковлевӑн портретне парнелерӗ.

Кӑнтӑр апачӗ хыҫҫӑн вара делегаци членӗсем «Заволжский» клубра Трак вӑтам шкулти педагогика коллективӗпе курнӑҫрӗҫ. Тӗлпулӑва В.А. Иванов, Д.Е. Иванов профессорсем, муниципаллӑ йӗркелӳсен республикӑри канашӗн ӗҫ тӑвакан директорӗ С.А. Николаев хутшӑнчӗҫ. Пресс-конференци йӗркелерӗҫ, хӑнасем концерт пӑхрӗҫ.

Делегаци тулли мар яваплӑ «Таябинка» Агрофирма» пӗрлешӳне, Трак ен ҫутҫанталӑкӗн илемлӗ вырӑнӗсене ҫитсе курчӗ. Хӑнасем район центрӗнчи Мухтав монуменчӗ умӗнче сӑн ӳкерттерчӗҫ. Вӗсемпе район администрацийӗн пуҫлӑхӗ __А.В. Шестаков__ та тӗл пулса калаҫрӗ.