Ҫӗр ҫинчи пурнӑҫ вӑхӑтлӑх. Кунта эпир хӑнара ҫеҫ. Кашни ҫын юлашкинчен ҫак ҫут тӗнчерен масар ҫулӗпе леш тӗнчене ӑсанать.

Пирӗн вара, ҫӗр ҫинче пурӑнма юлнӑ кашни ҫыннӑн сӑваплӑ тивӗҫӗ – вилнӗ ҫынсене хисеплесе асӑнасси, вӗсене асра тытасси, масар ҫине кайса ун йӗри-тавралӑхне тирпейлесе тӑрасси, масар синчи хӗрессене, палӑксене упрасси, ҫӗнетесси, вӗсен вил тӑприйӗсене тирпейлесе тӑрасси. Нумай ялсенче масар патне пыракан ҫула асфальт е хыт чул сарнӑ. Ҫав вӑхӑтрах нумай ялсенче ҫак ҫул питӗ япӑх. Унчченхи вӑхӑтра колхозсен вӑйӗпе сарнӑ пулсан, хальхи вӑхӑтра ҫак ҫула тирпейлеме ытларах ял халӑхӗ хӑй тӑрӑшать.

__Патӑрьел районӗнчи__ __Вӑтаел__ ялӗн аслӑ урамне совет саманинче асфальт сарса юлайнӑ пулсан масар патне каякан ҫул питӗ япӑхччӗ.

Кашни ҫулах ҫимӗкре ял халӑхӗпе пӗрлех ютра пурӑнакан Вӑтаел ҫыннисем масар ҫине вилнӗ тӑванӗсене асӑнма пуҫтарӑнаҫҫӗ. Ҫав кун чылай чухне ҫумӑр ҫунипе масар патне машинӑсемпе пыма ҫав тери йыварччӗ. Ку нумайӑшне пӑшӑрхантаратчӗ. Ҫавӑнпа ютра пурӑнакан Вӑтаелсем пуҫарнипе кӑҫал ҫак ҫула тирпейлеме шутларӗҫ. Паллах, укҫа-тенкӗпе ял канашӗ те, патшалӑх та пулӑшма пултарайманнине шута илсе, ял ҫыннисем хӑйсен шутӗнчен ӗҫе пурнӑҫлама шут тытрӗҫ. Ялта пурӑнакан Козлов Василий Владимировичпа Софронов Валерий Семенович ку ӗҫе пурнӑҫлама хӑйсем ҫине илчӗҫ. Кӗске вӑхӑт хушшинчех вӗсем 500 метра яхан тӑсӑлакан ҫула хыт чулпа сартарчӗҫ. Ялта пурӑнакансен вӑйӗпе ҫеҫ ку ӗҫе вӗҫне ҫитерме май ҫук. Ҫавӑнпа та ютра пурӑнакан Вӑтаелсем те питӗ активлӑ хутшӑнчӗҫ. Вӗсене валли ятарлӑ счет уҫса пачӗҫ. Чи малтанах ҫак ӗҫре __Шупашкарта__ ӗҫлесе пурӑнакан Яковлев Геннадий Минович врач-травматологӑн тӳпи пысӑк пулни ҫинчен асӑнса хӑвармалла. Унсӑр пуҫне Плечова А.Н., Щербаков В.П., Плечов В.Н., Яковлева О.Ф. тата ытти нумай ентешсен тӳпи пысӑк пулнине палӑртмалла. Хӑш-пӗр ҫемьесем ашшӗ-амӑшӗ ҫеҫ мар, пур ачи те ҫак ӗҫре пуҫарулӑх кӑтартрӗҫ. (Шайкина М.К., Соснова Р.Г., Шайкина В.Г., Захарова А.И., Чувайкин А.М. ачисем). Ҫавӑн пекех тата ял лавккинче ӗҫлекен Щербакова Надьӑпа Виноградова Альӑна тав сӑмахӗ каласшӑн. Вӗсем пулӑшнипе ҫак ҫула тирпейлеме укҫа пухса ҫитерме пултарчӗҫ.

Ҫак ӗҫе хутшӑннӑ (ӗҫпе, укҫа-тенкӗпе, ырӑ сӑмахпа) пур ҫынна та Вӑтаел масарӗнче канлӗх тупнӑ тете-аппасем, асатте-асаннесем, кукамай-кукаҫисем, атте-аннесем пулӑшса пыччӑр.