__Хĕрлĕ Чутайра|Хӗрлӗ Чутайра__ «Сывӑ пул, Ҫӑварни!» уяв иртрӗ. Чутайсем хӗле юрӑ-ташӑпа, шӳт-кулӑпа ӑсатрӗҫ. Райцентрти «Ҫӗнтерӳ» лапамне халӑх питӗ йышлӑ пухӑнчӗ. Пухӑннисене Хӗрлӗ Чутай пуҫлӑхӗ __Александр Степанов__, администраци пуҫлӑхӗ Александр Башкиров саламласа уява хаваслӑ ирттерме чӑнсе каларӗҫ. Унтан сцена ҫинче Чутайри культура ӗҫченӗсем Хӗле ӑсатса ҫуркуннене кӗтсе илнӗ ятпа концерт пуҫларӗҫ. Районти тӗрлӗ ялтан пуҫтарӑннӑ артистсем уява малалла тӑсрӗҫ. «Чи лайӑх пултарулӑ ушкӑнӗ» ята __Мăн Этмен|Мӑн Этмен__ ял тӑрӑхӗн ушкӑнӗ тивӗҫрӗ. Мӗнле кӑна вӑйӑ-кулӑ шутласа тупман-ши уява ертсе пыракансем! Кире пуканӗ йӑтасси, волейболла вылясси, вӗрен туртасси, пӗрене ҫинче вӑй виҫесси тата ытти тӗрлӗ вӑйӑ — вӗсенче пурте хаваспах хутшӑнчӗҫ.

Пухӑннисем вӗри чейпе тутлӑ икерчӗ савӑнсах ас тиврӗҫ. Ҫӑварни лашасем чупнипе малалла тӑсӑлчӗ. __Паньтăк|Паньтӑк__, __Мăн Этмен|Мӑн Этмен__, __Акчикасси__, __Хĕрлĕ Чутай|Хӗрлӗ Чутай__ тата __Атнар__ ял тӑрӑхӗсенчен килнӗ капӑрлатнӑ лавсем ҫинчи юмах паттӑрӗсем, капӑр инкесем юрла-юрла Чутай тӑрӑх вӗҫтерчӗҫ. «Чи лайӑх виҫ лаша» ята __Черепан__ ялӗнчен килнӗ виҫҫӗлле кӳлнӗ лав тивӗҫрӗ. «Чи лайӑх лав. Мухтавлӑ Чапаев» номинацире Хӗрлӗ Чутайсем мала тухрӗҫ. Уява хутшӑннӑ пур лав та парнесем илме тивӗҫлӗ пулчӗ. Хӗрлӗ Чутайсем «Чи капӑр лаша» номинацире те малтисем пулчӗҫ.

Уяв вӗҫӗнче Анатолий Ейков ҫӗнтерӳҫӗсене дипломсемпе парнесем парса чысларӗ.

Юлашкинчен Хӗле ӑсатнӑ ятпа улӑмран ӑсталанӑ кӳлепене ҫунтарса ячӗҫ.

__http://gov.cap.ru/home/69/2012/12%5f02%5f27%5f02/%D1%84%D0%BE%D1%82%D0%BE%D1%80%D0%B5%D0%BF%D0%BE%D1%80%D1%82%D0%B0%D0%B6/album/index.html|**Сӑнсем**__ (8)