__Хĕрлĕ Чутай районĕнче|Хӗрлӗ Чутай районӗнче__ тӳрех 3 социаллӑ объект тӑваҫҫӗ: район центрӗнчи шкул ҫумне хушма ҫурт, вӑй-хал культурипе спорт комплексӗ тата тӑлӑх ачасем валли 15 хваттерлӗ ҫурт. __Хĕрлĕ Чутайри|Хӗрлӗ Чутайри__ пӗтӗмӗшле пӗлӳ паракан вӑтам шкулӑн хушма ҫуртне «Ялӑн социаллӑ аталанӑвӗ» федераллӑ тӗллев программипе килӗшӳллӗн тӑваҫҫӗ. Халӗ кунта шалти ӗҫсем пыраҫҫӗ. Пӗрремӗш хутра ӗҫсем вӗҫленнӗ, иккӗмӗшпе виҫҫӗмӗшӗнче те тумалли нумаях юлман. Шыв тата ӑшӑ пӑрӑхӗсене хурса ҫитернӗ. Ҫавӑн пекех сакайӗнче ӑшӑ тытӑмне туса пӗтернӗ, вентиляции вырнаҫтарнӑ, пур ҫӗрте те пластик кантӑксем лартнӑ. Ҫурта 2012 ҫулхи нарӑсӑн 23-мӗшӗнче хута яма палӑртаҫҫӗ. Унӑн лаптӑкӗ 1 408,5 тӑваткал метр. Вӑл 240 ача вӗренмелӗх пулать.

Вӑй-хал культурипе спорт комплексне вара кӑҫал ҫӗртмере, __Республика кунĕ|Республика кунӗ__ тӗлне уҫасшӑн. Халӗ ҫуртӑн тимӗр кӳлепине пуҫтарса пӗтернӗпе пӗрех. Нарӑс уйӑхӗн варринче кирпӗч хурса пӗтересшӗн. Ҫавӑн пекех кӗске вӑхӑтрах ҫурта хупламалла тата ӑшӑ хатӗрӗсене вырнаҫтармалла. Комплексра спорт пӳлӗмӗ, бассейн, аэробика залӗ тата ытти ятарлӑ пӳлӗмсем пулӗҫ. Спорт ҫуртне республика тата федераллӑ хысни укҫи-тенкипе тӑваҫҫӗ.

__Хĕрлĕ Чутайĕнче|Хӗрлӗ Чутайӗнче__ ҫавӑн пекех тӑлӑх ачасем валли ҫурт тума пуҫланӑ. Вӑл 15 хваттерлӗ, 3 хутлӑ пулать. Паянхи кунта никӗсне хывнӑ тата стенасене хӑпартма пуҫланӑ. Ҫурта кӑҫал ҫӗртме уйӑхӗнче хута ямалла.