Оля Семёнова (паспортри чӑн ячӗ — Семенова Ольга Владимировна) — паллӑ чӑваш эстрада юрӑҫи тата телеертӳҫи.

Вӑл 1982 ҫулхи ҫурла уйӑхӗн 8-мӗшӗнче Чӑваш АССРӗн Элӗк тӑрӑхӗнчи Элӗк ялӗнче ҫуралнӑ.

Пӗлӗвӗ тата ӗҫ-хӗлӗ

1999 ҫулта И. Н. Ульянов ячӗллӗ Элӗк вӑтам шкулӗнчен вӗренсе тухнӑ. Кайран, 1999–2002 ҫулсенче, Чӑваш Республикин культура училищинче хор дирижёрӗ пулма пӗлӳ илнӗ. 2008 ҫулта вара Атӑл-Вятка патшалӑх службин академине ӑнӑҫлӑ вӗренсе пӗтерсе аслӑ пӗлӳ дипломне алла илнӗ.

Ольга Владимировнан ӗҫӗ-хӗлне 2007 ҫулта «Чӑваш Ен» патшалӑх телерадиокомпанийӗнче пуҫланӑ, унта вӑл 2009 ҫулччен реклама пайӗн менеджерӗнче вӑй хунӑ. 2014 ҫултанпа вара ЮТВ телеканалта ертӳҫӗ пулса ӗҫлет.

Телекураври малтанхи проектсене вӑл Данила Ленскийпе пӗрле хатӗрлесе ертсе пынӑ («Караоке-Батл», «Просыпайся, лето…»). Каярахпа хӑйӗн харпӑр кӑларӑмӗсене йӗркелеме тытӑннӑ, куракансем ӑна «Новое Я», «Успешные люди», «Весёлый чемоданчик», «Чудо-дети», «Игра образов» тата ытти проектсем тӑрӑх лайӑх пӗлеҫҫӗ.

Пултарулӑхӗ

Чӑваш эстрадине юрӑҫ 2008 ҫулта уҫнӑ. Унӑн чи пӗрремӗш хитне — «Савар-и пӗр-пӗрне чунтан?» юрра (сӑвви — амӑшӗн, Елизавета Ивановӑн; кӗвви — Виктор Дмитриевӑн) — халӑх питӗ ӑшшӑн йышӑннӑ. Ҫав ҫулах вӑл хӑйӗн йӑмӑкӗпе Светланӑпа пӗрле «Гармония» ушкӑн йӗркеленӗ.

2015 ҫулта Чӑваш патшалӑх филармонийӗнче «Гармония» ансамбль «Хавас» ушкӑнпа пӗрле хӑйӗн малтанхи концертне лартнӑ. Ун хыҫҫӑн, 2016 ҫулхи юпа уйӑхӗнче, Шупашкарти Трактор тӑвакансен культура керменӗнче Ольгӑн харпӑр пултарулӑх каҫӗ кӗрлесе иртнӗ.

Унӑн пултарулӑхӗнче чӑвашла юрӑсен авторӗсем — Елизавета Иванова тата Валерий Раштав сӑвӑҫсем, Александр Павлов аранжировщик. Вырӑс юррисене вара Екатерина Семёнова сӑвӑҫ тата Александр Быковский аранжировщик хатӗрлеме пулӑшаҫҫӗ.

Паллӑ юррисем:

• «Калатпӑр ҫук», «Чи ҫепӗҫ чечек», «Ҫутӑ каҫӑн ытамӗнче», «Кунҫул тӗшши», «Сӑмах», «Икӗ ҫӑлтӑр», «Канӑҫсӑр чӗрем», «Ҫӗнӗ ҫул уявӗ», «Тавах сана, кураканӑм», «Татса ҫиеймӗн», «Тӗлӗк кӑна», «Тунсӑх», «Уйрӑлу», «Хурӑнпа калаҫни», «Шурӑ хурӑн», «Юрату», «Каллех пӗччен» тата ыттисем те.

Дуэтпа шӑрантарнӑ юррисем:

• Ҫиларманпа — «Юрату вӑл...», «Тупа»;
• Типшӗм Сашукпа — «Тӑван кил», «Макӑрать Нӑрваш»;
• Сергей Лекеровпа — «Дерзкая»;
• Алексей Московскийпе — «Чӑн юрату — яланлӑх»;
• Алиса Ижендеевӑпа — «Виҫҫӗмӗшӗ ытлашши»;
• Данила Ленскийпе — «Каҫар та сывӑ пул», «Каҫхи тӗтре», «Пӑхман хӗвеле пӑхтараймӑн»;
• Андрей Думилинпа — «Ухӑҫпа арӑслан».

Ҫитӗнӗвӗсем

1. «Вирьял шевлисем» фестиваль-конкурсӑн тӗп призӗ (Гран-при) («Гармония» ушкӑнпа пӗрле);
2. ЮТВ телеканалӑн «Ҫулталӑкри чи лайӑх ушкӑн» номинаци ҫӗнтерӳҫи («Гармония»);
3. ЮТВ телеканалӑн «Ҫулталӑкри чи лайӑх клип» номинаци ҫӗнтерӳҫи (Данила Ленскийпе юрланӑ «Канӑҫсӑр чӗре» клипшӑн, авторӗсем — В. Раштав, А. Павлов);
4. ЮТВ телеканал версийӗпе «Ҫулталӑкри чи лайӑх шоумен» ята тивӗҫнӗ.

Ҫемьи

• Ашшӗ — Иванов Владимир Петрович.
• Амӑшӗ — Иванова Елизавета Васильевна. Вӑл паллӑ сӑвӑҫ, чылай юрӑ сӑмахӗн авторӗ, ҫав шутра Чӑваш наци радиовӗн гимнне те вӑл ҫырнӑ.
• Ҫемьере виҫӗ хӗр ҫитӗннӗ: Ольга, Светлана тата Мария.
• Мӑшӑрӗ — Семенов Сергей Иванович.
• Икӗ ывӑл пӑхса ӳстереҫҫӗ: Константинпа Владислава.