Михайлов Анатолий Михайлович — чӑваш композиторӗ, баянисчӗ, музыка педагогӗ тата общество ӗҫченӗ. Чӑваш АССР тава тивӗҫлӗ культура ӗҫченӗ (1972), Чӑваш АССР тава тивӗҫлӗ ӳнерӗн ӗҫченӗ (1991), Пӗтӗм Раҫҫейри музыка обществин тава тивӗҫлӗ ӗҫченӗ, И. Я. Яковлев ячӗллӗ Пӗтӗм чӑвашсен наци премийӗн лауреачӗ.
Анатолий Михайлович Михайлов 1931 ҫулхи утӑн 18-мӗшӗнче Чӑваш АССР-ӗнчи Ҫӗрпӳ районне кӗрекен Старосёлка ялӗнче ҫуралнӑ. Йӑвански салинчи шкулта ҫичӗ класс пӗлӳ илнӗ. 1945–1947 ҫулсенче Ҫӗрпӳри ял хуҫалӑх техникумӗнче вӗреннӗ.
1948 ҫултанпа Ҫӗрпӳри ача ҫуртӗнче музыка ертӳҫинче тата Ҫӗрпӳри профтехшкулта баянист-аккомпаниатор пулса ӗҫленӗ. 1954 ҫулта Ф. П. Павлов ячӗллӗ Шупашкарти музыка училищинчи дирижёрпа хор уйрӑмне (В. Ф. Вержбицкийӑн дирижёр класӗнче, Д. С. Нофель-Ходяшеван фортепиано класӗнче, Г. Г. Лисковӑн гармонипе композици класӗнче) вӗренсе пӗтернӗ.
Совет Ҫарӗнче хӗсметре тӑнӑ хыҫҫӑн (унта вӑл полкри юрӑпа ташӑ ансамблӗн дирижёрӗ пулнӑ), 1957–1958 ҫулсенче М. П. Мусоргский ячӗллӗ Урал патшалӑх консерваторинче композици класӗнче вӗреннӗ.
1958–1964 ҫулсенче Шупашкар шкулӗсенче музыкӑна, ҫавӑн пекех Шупашкарти музыка училищинче, Канашри педагогика училищинче тата Ҫӗрпӳри культура тата ҫут-ӗҫ училищинче дирижировани, баян, фортепиано, музыка теорийӗ дисциплинисене вӗрентнӗ. 1962–1964 ҫулсенче Чӑваш республикинчи Халӑх пултарулӑх ҫурчӗн методисчӗ, 1964–1977 ҫулсенче — унӑн директорӗ пулса ӗҫленӗ.
1971 ҫулта СССР Композиторӗсен пӗрлӗхне йышӑннӑ. 1977 ҫултанпа хӑйне пӗтӗмпех композитор пултарулӑхне, концерт тата ҫутта кӑларас ӗҫе халалланӑ. Чӑваш Енре тата Вӑтам Атӑлҫи хулисенче 300 яхӑн автор концерчӗ тата пултарулӑх тӗлпулӑвӗ ирттернӗ.
1990 ҫултанпа — Чӑваш Енри Композиторсен ассоциацийӗн президенчӗ. 1994 ҫултанпа — Чӑваш Республикинчи Музыка обществин правленийӗн председателӗ.
1997 ҫулхи чӳкӗн 22-мӗшӗнче нумай вӑхӑт йывӑр чирленӗ хыҫҫӑн Шупашкарта вилнӗ.
1000 яхӑн музыка хайлавӗ ҫырнӑ. «Плывут, летят крылатые» опереттӑн (С. Щербаковӑн либреттипе), «Крутой поворот» музыка комедийӗн (В. Ухли либреттипе) авторӗ. Республика пукане театрӗн 15 спектаклӗ валли тата П. Осиповӑн «Айтар» драми валли музыка ҫырнӑ.
Вокалпа хор валли «Города Поволжья» ҫаврӑм, фортепиано, виолончель, сӗрме купӑс, духовой оркестр валли пьесӑсем (ҫав шутра «Марш военных лет», «Марш ПТУ» маршсем), чӑваш поэчӗсен (И. Ивникӑн, А. Лукинӑн, А. Савельевӑн тата ыттисен) сӑввисемпе романссемпе юрӑсем хайланӑ. Чӑваш Ен хулисем, чӑваш ҫӗрӗн паттӑрӗсем, Мускав тата Вӑтам Атӑлҫи хулисем ҫинчен ҫырнӑ юрӑсем пысӑк вырӑн йышӑнаҫҫӗ.
Хайлавӗсем «Мелодия» фирмӑн грампластинкисем ҫинче тухнӑ, чӑваш тата Раҫҫей радиовӗн фончӗсенче упранаҫҫӗ. Мускавпа Чӑваш Енре унӑн 10 автор пуххи тухнӑ, ҫав шутра:
Мӑшӑрӗ — Лидия Терентьевна Михайлова. 1998 ҫулхи акара вӑл композиторӑн докуменчӗсене Чӑваш Республикинчи Хальхи историн патшалӑх архивне сыхласа хӑварма панӑ.
1999 ҫултанпа Ҫӗрпӳре Анатолий Михайлов композитор ячӗллӗ Республика шайӗнчи музыка фестивалӗ иртет. Унӑн пултарулӑхне халалланӑ «Михайлов вулавӗсем» тата конкурссем иртеҫҫӗ.
Статья каҫми :: Пичет версиӗ 
+14.3 °C