cap.ru сайтри сӑн

Чӳк уйӑхӗн 7-мӗшӗнче, паян, 14 сехетре, Шупашкар хула пухӑвӗн депутачӗсен черетсӗр 37-мӗш ларӑвӗ пулать. Унта хула пуҫлӑхӗн тивӗҫӗсене вӑхӑтлӑха пурнӑҫлакан ҫынна суйлӗҫ.

Кунсӑр пуҫне Шупашкар пуҫлӑхне суйлассипе иртекен конкурса, Шупашкар хула пухӑвӗн депутачӗсен ҫиччӗмӗш созывӗн ҫӗнӗ председателӗ кам пулассине сӳтсе явӗҫ.

Чӑваш Ен Элтеперӗ Олег Николаев Китая ҫул тытӗ. Унта вӑл ӗҫпе кайӗ.

Чӑваш Ен делегацийӗ Китайра тӑватӑ кун пулӗ: чӳк уйӑӗн 6-9-мӗшӗсенче. Вӗсем Цзянси провинцири Нанчань хулинче иртекен «Волга–Янцзы» форматлӑ канашӑн лаӑвне хутшӑнӗҫ.

Чӑваш Ен делегацине Олег Николаевсӑр пуҫне тата кам кӗрессине асӑнман.

cap.ru сӑнӳкерчӗкӗ

Паянтан Шупашкар муниципаллӑ округӗн администрацине Владимир Михайлов ертсе пырать. Вӑл унччен Тӑвай муниципаллӑ округӗн пуҫлӑхӗ пулнӑ.

36 ҫулти Владимир Михайлов кӑҫал авӑн уйӑхӗн варринчен Тӑвай округӗнчен должноҫрен кайнӑ. Вӑл ку муниципалитета 2020 ҫултанпа ертсе пынӑ. Унтан кайсан Шупашкар округӗн администрацийӗн пуҫлӑхӗн тивӗҫӗсене вӑхӑтлӑха пурнӑҫланӑ.

forum.na-svyazi сӑнӳкерчӗкӗ

Чӑваш Енӗн вӗренӳ тата ҫамрӑксен политикин министрӗн пӗремӗш ҫумне Алексей Лукшина ӗҫрен кӑларнӑ. Ҫавӑн ҫинчен калакан хушӑва республика ертӳҫи Олег Николаев паян алӑ пуснӑ, документа влаҫ органӗсен официаллӑ порталӗнче вырнаҫтарнӑ.

Вӗренӳ министрӗн Дмитрий Захаровӑн паянхи кун икӗ заместитель тӑрса юлнӑ. Вӗсем – Надежда Никандрова тата Марина Лежнина.

Алексей Лукшин министерствӑри ҫав пукана шӑп та лӑп виҫӗ ҫул йышӑннӑ. Министр ҫумӗн тилхепине ӑна 2020 ҫулхи юпа уйӑхӗн 22-мӗшӗнче тыттарнӑ. Унччен вӑл Шупашкарти 45-мӗш шкул директорӗнче ӗҫленӗ.

t.me/oanikolaev каналти сӑнӳкерчӗк

Паян, юпа уйӑхӗн 30-мӗшӗнче, Чӑваш Ен Элтеперӗ Олег Николаев республикӑн ҫӗнӗ прокурорӗпе Эдуард Гиматовпа паллашнӑ.

Аса илтерер: Эдурад Гиматова Чӑваш Ен прокурорӗ пулма Раҫҫей Президенчӗн Хушӑвӗпе пилӗк ҫуллӑха ҫирӗплетнӗ.

Унпа Элтепере РФ генеральнӑй прокурорӗн ҫумӗ Николай Шишкин паллаштарнӑ.

Эдуард Рафикович Курган облаҫӗнчи Боровское ялӗнче 1980 ҫулта ҫуралнӑ. 2002 ҫулта Тӗменти пашалӑх университетӗнчен вӗренсе тухнӑ. Прокуратура органӗсенче 2003 ҫулхи ҫу уйӑхӗнченпе ӗҫлет. Тӗмен прркурорӗ, Тамбов облаҫӗ прокурорӗн ҫумӗ пулнӑ.

forum.na-svyazi.ru сӑнӳкерчӗкӗ

Ҫӗнӗ Шупашкар тата Шупашкар хулисенче пӗрер пуҫлӑх юлӗ.

Хӑй вӑхӑтӗнче ҫавӑн пек пулнӑччӗ-ха. Анчах вырӑнти хӑй тытӑмлӑх ҫинчен калакан саккуна улшӑну кӗртнӗ хыҫҫӑн администраци пуҫлӑхӗсем (вӗсене тепӗр майлӑ сити-менеджер та теме тытӑнчӗҫ) пулса тӑчӗҫ тата Депутатсен пухӑвӗсен председателӗсене муниципалитетсен пуҫлӑхӗсем тесе тире урлӑ ҫырма тытӑнчӗҫ.

Шупашкарпа Ҫӗнӗ Шупашкарта малашне пӗр пуҫлӑхлӑ меслет ҫине куҫӗҫ.

"На связи" форумри сӑн

Паян Шупашкар хула пухӑвӗн ларӑвӗнче хула мэрӗ Евгений Кадышев администраци пуҫлӑхне Денис Спирина ӗҫрен кӑларнӑ. Кайран хӑй те ӗҫрен кайнӑ.

Ку - хут ҫинче тума кирлӗ ӗҫ кӑна. Мӗншӗн тесен муниципалитет реформипе килӗшӳллӗн икӗ пуҫлӑх должноҫне пӗрлештерӗҫ. Унччен вара сити-менеджер тивӗҫӗсене администраци пуҫлӑхӗн ҫумӗ Ольга Чепрасова пурнӑҫлӗ.

Кайран конкурс ирттерсе Шупашкар хула администрацийӗн пуҫлӑхне суйлӗҫ. Вӑл унччен сити-менеджер пурнӑҫланӑ ӗҫсенех тӑвӗ.

"Чебмедиа" сайтри сӑн

Шупашкар хула администрацийӗн пуҫлӑхӗн Денис Спиринӑн тӳлевсӗр ӗҫлекен канашҫӑсем пулӗҫ. Хальлӗхе унӑн – пӗр канашҫӑ. Вӑл – ҫамрӑксемпе ӗҫлекен Кирилл Мухин, унччен спецназ пулнӑскер.

Йышӑну проектӗнче палӑртнӑ тӑрӑх, канашҫӑсем сити-менеджер хушӑвӗпе тӳлевсӗр ӗҫлӗҫ, должноҫсене йышӑнаймӗҫ. Вӗсене хула администрацийӗн пуҫлӑхӗ мӗн чухлӗ вӑхӑт ӗҫленине кура палӑртаҫҫӗ, хӑйсем заявлени ҫырсан тивӗҫе пурнӑҫлама шанаҫҫӗ.

cap.ru сайтри сӑн

Ӗнер Тӑвай муниципаллӑ округӗн депутачӗсем уҫӑ сасӑлав ирттерсе администраци пуҫлӑхне суйланӑ. Ҫак должноҫе администраци пуҫлӑхӗн ҫумӗ пулнӑ Олег Ломоносов йышӑннӑ.

Олег Анатольевич 45 ҫулта. Вӑл Тӑвайрах ҫуралса ӳснӗ, И.Н.Ульянов ячӗллӗ ЧПУра «истори» специальноҫпе вӗреннӗ. Кайран Атӑл-Вятка академи патшалӑх службинче пӗлӳ илнӗ.

Унӑн ӗҫ стажӗ – 23 ҫул, вӗсенчен 20-шне вырӑнти хӑйтытӑмлӑх органӗсенче вӑй хунӑ.

Чӑваш Енри общество палатин ертӳҫин пуканӗ пушӑ. Ун валли ҫын шыраҫҫӗ. Ҫавна май конкурс ирттереҫҫӗ.

Унччен ку должноҫре 32 ҫулти Артем Йовенко ӗҫленӗ. Вӑл ҫурла уйӑхӗн 1-мӗшӗнче ӗҫрен кайнӑ.

Конкурс условийӗсемпе килӗшӳллӗн, ҫак должноҫе йышӑнма хатӗр ҫыннӑн аслӑ пӗлӳ, ертӳҫӗре 3 ҫултан кая мар ӗҫлени, 5 ҫултан кая мар стаж пулмалла. Документсене чӳк уйӑхӗн 7-мӗшӗччен йышӑнаҫҫӗ.