cap.ru порталтан илнӗ скриншот

Чӑваш Енри шкулсенчи ачасем чӑваш чӗлхипе тата литературипе, тутар чӗлхипе тата литературипе, мордва чӗлхипе тата литературипе регион тата халӑхсем хушшинче олимпиадӑсенче ҫӗнтернӗшӗн вӗсен вӗрентекенӗсене укҫан хавхалантарма йышӑннӑ. Документа республика Элтеперӗ Олег Николаев алӑ пуснӑ.

Хӑш-пӗр учителе 100-шер пин тенкӗ преми парӗҫ, хӑшӗсене — 50-шар пин тенкӗ. Вӗсем Патӑрьел, Йӗпреҫ, Улатӑр, Пӑрачкав, Вӑрмар, Ҫӗрпӳ, Муркаш, Комсомольски районӗсенчи шкулсенче ӗҫлеҫҫӗ.

culture.cap.ru cӑнӳкерчӗкӗ

Чӑваш Енре мигрантсем сахал мар. Вӗсене республикӑн социокультура пурнӑҫне явӑҫтарас ыйтӑва ӗнер, ҫурла уйӑхӗн 8-мӗшӗнче, тӗрлӗ шайри тӳре-шара пухӑнсах сӳтсе явнӑ.

Республикӑн культура, национальноҫсен ӗҫӗсен тата архив ӗҫӗн министрӗн ҫумӗ Георгий Богуславский мигрантсене адаптацилес, миграци политикин ыйтӑвӗсем паян кирек хӑш ҫӗршывпа регионшӑн та ҫивӗч тесе палӑртса хӑварнӑ. Республикӑри мигрантсенчен 90 проценчӗ ытларах паян Шупашкарта регистрациленнӗ. Вӗсенчен хӑшӗсем пирӗн тӑрӑхра ӗҫлесе пурӑнас кӑмӑллӑ.

Ҫӗнӗ Шупашкарта пӗр арҫынпа хӗрарӑм пушарта шар курнӑ. Инкек ҫурла уйӑхӗн 6-мӗшӗнче каҫхи сакӑр сехетре пулса иртнӗ.

Хулари Ҫамрӑксен урамӗнчи 8-мӗш ҫуртри пӗр пӳлӗм ҫунма пуҫланӑ. Унта пулнӑ арҫынпа хӗрарӑм сӗрӗмпе наркӑмӑшланнӑ. Вӗсене ҫунакан пӳлӗмрен илсе тухма пултарнӑ. Вӗсене вӑхӑтра пулӑшу кӳнӗ.

Пушара 15 минутра сӳнтерме пултарнӑ.

Ҫулталӑк пуҫланнӑранпа Чӑваш Енре 912 пушар тухнӑ, вӗсенче 54 ҫын курнӑ, 39 ҫын вилнӗ, 123 ҫынна ҫӑлса хӑварнӑ. Пушар 3 миллион тенкӗлӗх шар кӑтартнӑ.

Интерфакс тунӑ сӑн

Куславкка районӗнчи Куснар ялӗ ҫывӑхӗнчи «Чӗмсӗр Сӑр чиккин строителӗсене» палӑка утӑ уйӑхӗн 1-мӗшӗнче савӑнӑҫлӑ лару-тӑрура уҫрӗҫ. Унтанпа вӑхӑт нумай та иртмен - ҫӑхавсем те пулнӑ. Ҫынсем халӑх тетелӗсенче ун пирки япӑх комментарисем ҫырнӑ. Ҫакна регион управленийӗн центрӗнче пӗлтереҫҫӗ.

Газонсенче ҫум курӑк ашкӑрать, каҫхине палӑк ҫывӑхӗнче ҫутӑ та ҫук. Ҫапла хурласа ҫырнӑ ҫынсем.

Халӗ палӑка хӑтлӑлатас ӗҫ пырать: ҫум курӑка ҫулаҫҫӗ, брусчаткӑсене йӗркене кӗртеҫҫӗ. Унта туристсем пирӗн регионтан кӑна мар, ытти хуларан та килеҫҫӗ. Палӑка кӗрсе курма чӑрмавсем ҫук.

Ӗнер хыпарсем хушшинче Китайри авалхи кӗпер ҫунса кайни пирки сӑмахларӗҫ. Видеосене пӑхнӑ май паллӑ пулчӗ ӗнтӗ — ҫӑлса хӑварайман, вӑл тӗппипех ҫунса кайнӑ. Ҫапах та чи тӗлӗнмелли кунта — кӗпере 900 ҫул каялла туса лартни. Пин ҫул каялла тенӗ пек туса лартнӑскер ҫак тарана ҫити упранса юлнӑ (ӗнер вӑл ҫунса кайнине шута илмесен)! 1742 ҫулта ун ҫинче пушар тухнӑ пулнӑ-ха, анчах вырӑнти халӑх ӑна юсаса ҫӗнетнӗ, пӗтме паман.

Йывӑҫран тунӑ кӗперсем

Тӗрӗссипе йывӑҫ ҫирӗп кӗпер тума чи юрӑхлӑ материал мар. Йывӑҫ ҫумӑр-юр таврашне пула ҫӗрет; вут-ҫулӑмпа ӑна питӗ хӑвӑрт ҫунтарса яма пулать. Сӑмахӗ кунта чӗртсе янинче кӑна мар — ҫиҫӗм ҫапнипе те ӑна ҫулӑм ярса илме пултарать-ҫке. Ваньань кӗперӗ ҫинче ҫулӑм мӗнле сӑлтава пула тухнине тӗпчевҫӗсем палӑртӗҫ ӗнтӗ, анчах ҫапах та ҫак пӑтӑрмах йывӑҫ кӗпер тума чи юрӑхлӑ материал пулманнине ҫирӗплетсе кӑтартать.

Апла пулин те йывӑҫран кӗпер тунин лайӑх енӗсем те пур. Калӑпӑр, йывӑҫ йӗри-тавра пит нумай пулсан ҫак материалпа усӑ курма пулать.

Малалла...

Святослав Фёдоров. cap.ru порталтан илнӗ сӑнӳкерчӗк

Ҫурла уйӑхӗн 8-мӗшӗнче паллӑ офтальмолог, академик Святослав Фёдоров ҫуралнӑранпа 95 ҫул ҫитрӗ. Мухтавлӑ тухтӑр — «Куҫ микрохирургийӗ» отрасльсем хушшинчи ӑслӑлӑхпа техника комплексне пуҫарса янӑ ҫын.

Святослав Николаевич Шупашкарта пӗтӗмпе те виҫӗ ҫул: 1958—1961 ҫулсенче — пурӑннӑ. Апла пулин те хула историне ӗмӗрлӗхе кӗрсе юлнӑ.

1960 ҫулхи утӑ уйӑхӗн 5-мӗшӗнче вӑл Шупашкарта куҫ шӑрҫине ылмаштарассипе ӑнӑҫлӑ операци ирттернӗ. Катарактӑпа ҫуралнӑ 12 ҫулти хӗрача ҫапла вара курма тытӑннӑ. Ҫав операци куҫ микрохирургине пуҫарса янӑ та.

Искусствӑлла куҫ шӑрҫине оргкантӑкран (плексикуҫ) Святослав Фёдоровӑн пӗчӗк хваттерӗнче Шупашкарти электроаппаратура завочӗн слесарӗпе Семён Мильманпа пӗрле хатӗрленӗ.

Шупашкарта Святослав Николаевич ун пек 4 операци тума ӗлкӗрнӗ. Унтан унӑн куҫса кайма тивнӗ. Апла пулин те Чӑваш Ене манӑҫа кӑларман. «Ромашка» операци тата диагностика конвейерӗсене хатӗрлеме вӑл Шупашкарти конструкторсене шаннӑ, 1987 ҫулта отрасльсем хушшинчи ӑслӑлӑхпа техника комплексӗн пӗрремӗш филиалне уҫнӑ.

Паян Шупашкарта Святослав Фёдоров урамӗ, скверӗ пур, бюст вырнаҫтарнӑ.

Малалла...

culture.cap.ru сӑнӳкерчӗкӗ

Чӑвашсем Хусанта иккӗмӗш хут иртнӗ «Этно-fashion» фестивале хутшӑннӑ. Кун пирки Телеграмри чӑвашла каналсенчен пӗри пӗлтернӗ.

Культура фестивалӗнче «Паха тӗрӗ» фабрика хӑй ӑсталакан тумтире кӑтартса панӑ. Чӑваш пикисем наци тумне «Ҫиларман» ушкӑн юрри янӑранӑ, Александр Воробьевпа Олег Вунберов чӗрӗ сасӑпа юрласа чӑваш тумӗн куравне тата илемлӗрех тума пулӑшнӑ.

«Культура кочӗ — пурнӑҫ стилӗ» ятпа йӗркеленӗ ӗҫ-пуҫ Хусанти Г. Камал ячӗпе хисепленекен театр умӗнчи тӳремре иртнӗ.

Суд приставӗсен архивӗнчи сӑн

31 ҫулти хӗрарӑма амӑшӗн правинчен хӑтарнӑ. Унӑн икӗ ачи урӑх ҫемьере пурӑнаҫҫӗ. Унӑн вара алимент тӳлемелле пулнӑ. Анчах вӑл укҫа куҫарса паман. Куншӑн ӑна административлӑ майпа темиҫе хутчен явап тыттарнӑ.

Ку та пулӑшман. Алимент парӑмӗ 200 пин тенкӗрен ытла иртнӗ. Ҫурла уйӑхӗн 3-мӗшӗнче ӑна суд приставӗсем уйрӑма илсе ҫитернӗ. Хӗрарӑм унта йӗркеллӗ пурнӑҫ патне таврӑнма хӑтланнине, ачасен пурнӑҫӗпе кӑсӑкланнине каласа кӑтартнӑ.

Анчах хӗрарӑм алмиент тӳлӗ-и? Унӑн, суд йышӑнӑвӗпе килӗшӳллӗн, уйӑхсерен икӗ ачишӗн 21 пин тенкӗ куҫармалла. Ун тӗлӗшпе пуҫиле ӗҫ пуҫарнӑ.

forum.na-svyazi.ru сӑнӳкерчӗкӗ

Ҫу уйӑхӗн 19-мӗшӗнче Шупашкарти Ленин районӗнче вырнаҫнӑ складсенчен пӗринче икӗ кладовщица хирӗҫсе кайнӑ. Вӗсенчен пӗри сӑмаха каличчен нумай шухӑшласа тӑман — хут ҫинче ҫырма юраман сӑмахсемпе перкелешме тапранса кайнӑ. Тепри ҫӗтсе кайман — диктофон туртса кӑларса ҫырса пынӑ.

Шар курнӑ кладовщица евитлеме прокуратурӑна ҫул тытнӑ.

Усал сӑмахсемпе перкелешнӗ, тепӗр ҫынна ним мар кӳрентерсе пӗтерме хӑюлӑх ҫитернӗ 36 ҫулти хӗрарӑма суд административлӑ майпа явап тыттарса 3 пин тенкӗ штраф хурса панӑ.

cap.ru сайтри сӑн

Тинех уҫӑлнӑ! Сӑмах – Шупашкарти «Кӗрӗк» патӗнчи ҫӳлтен каҫмалли кӗпер пирки.

Ҫак каҫӑн 2014 ҫултах уҫӑлмалла пулнӑ. Темиҫе подрядчик те улшӑннӑ. Юлашки 8 ҫулта тӳре-шарана куншӑн халӑхран мӗнле кӑна сӑмах тивмен-ши? Халӑха ку каҫҫа «коррупци палӑкӗ» тесе те ят панӑ.

Тинех унӑн алӑкӗ ҫинчи ҫакӑнса тӑракан ҫӑрана илнӗ. Халӗ ҫынсем Сӗнтӗрвӑрри ҫулӗ ҫинче ҫӑмӑллӑнах каҫса ҫӳреме пултараҫҫӗ. Сӑмах май, халӗ унти ҫула юсаҫҫӗ.