Чӑваш Ен Элтеперӗн тивӗҫӗсене вӑхӑтлӑх пурнӑҫлакан Михаил Игнатьев тӗрлӗ районпа хулана, предприяти-организацие ҫине-ҫинех тухса ҫӳрет. Ӗнер вӑл блогерсемпе Шупашкар районӗнчи Апаш ялӗ ҫывӑхӗнчи кану базинче тӗл пулнӑ.

Тӗнче тетелӗнче хӑйсен шухӑшне ҫыракансем Элтепер тивӗҫӗсене вӑхӑтлӑх пурнӑҫлаканпа курнӑҫма кӑмӑлпах пуҫтарӑннӑ тесе пӗлтерет «Правда ПФО» интернет-кӑларӑм. Блогерсем сӗнекен шухӑшсем анлӑшӗпе палӑрса тӑман-мӗн, вӗсем ҫул-йӗр хӑрушсӑрлӑхӗнчен пуҫласа виртуаллӑ куравсем йӗркелессипе ҫыхӑннӑ ыйтусене хускатнӑ. Михаил Игнатьев пурне те тимлӗн итленӗ, кайран вӑл ҫапларах пӗтӗмлетнӗ: «Чӑн пурнӑҫпа ҫыхӑннӑ сирӗн идейӑрсемпе шухӑшӑрсем республикӑра пурӑнакансемпе ҫыхӑннӑ, — тенӗ Михаил Васильевич. — Ҫулланнисемпе те, ача пахчинчи ача шутланакансемпе те, вӑренекенсемпе те. Анчах эпӗ сире тепӗр ене тимлӗх уйӑрма ыйтнӑ пулӑттӑм, тӗрӗсрех, наци сывлӑхне. Ӑна сывӑ апатланупа ҫыхӑнтарма. Пахалӑхсӑр апат-ҫимӗҫшӗн укҫа тӳлесе питӗ нумай ҫын йӑнӑшать. Кайран — аптекӑсем, пульницӑсем, сипленӳ тата каллех ҫемье хыснинчен тӑкаклану. Халӗ санкцие лекнӗ тавара пӗтерме тытӑннӑ, эпир ку ыйтӑва правӑна сыхлакан органсемпе сӳтсе явнӑ. Пирӗн те Польша панулмийӗ пур, пӗтермелли хӑш-пӗр апат-ҫимӗҫ. Малалла, ҫӳп-ҫап, ҫурт-йӗрпе коммуналлӑ хуҫалӑх пирки каласан. Мӗншӗн яллӑ вырӑнта пирӗн ыйтусем пур? Унта контейнерсем тулса ларнӑ, мӗншӗн тесен никам та тӳлесшӗн мар. Ҫынсене тӳлеттерме вӗрентмелле е вӗсем хӑйсем илсе тухчӑр».

#тӗлпулусем, #тӳре-шара, #политика, #Элтепер, #Апаш, #Шупашкар районӗ, #МИХсем