Мари университечӗ

Иртнӗ эрнере чӑваш филологийӗпе культура факультечӗн тӑватӑ студентки Мари патшалӑх университечӗн финно-угроведени институтӗнче наукӑпа прктика конференцийӗнче пулчӗҫ. Вӗсем — С.Чернова, А.Димитриева (4 курс), О.Иванова, Т.Ефремова (3 курс). (Ҫулҫӳреве йӗркелеме пулӑшнӑ 4 курс студентне Е.Филиппова — пысӑк тав сӑмахӗ).

Чӑваш хӗрӗсем литература пӗлӗвӗ тата фольклор секцийӗсенче тухса калаҫрӗҫ. Кӑсӑклансах итлерӗҫ вӗсен доклачӗсене мари преподавателӗсемпе студенчӗсем. Ҫине-ҫинех ыйту пачӗҫ, тӗпчерӗҫ. А.Димитриева паллӑ чӑваш ҫыравҫин хайлавӗсенчи хӗрарӑм шӑпине йӗркеленӗ, докладра вӑл Ч.Айтматов кӑркӑс ҫыравҫин хайлавӗсене Ю.Скворцовӑннипе танлаштарнӑ. Хӗрӳллӗ хуравланипе, ҫухалса кайманнипе палӑрчӗҫ пирӗн студенткӑсем.

Кӳршӗ республикӑри ҫамрӑксен доклачӗсене те хаваслансах итлерӗҫ вӗсем. Йошкар-Оласем малтан ҫармӑсла калаҫрӗҫ. Вӑл хушӑра мари чӗлхипе вулакан докладсене тӑнласа пӗр пек янӑракан сӑмахсене уйӑрса илме, мӗн те пулин ӑнкарма тӑрӑшрӗҫ чӑвашсем. Кайран, сӑмах мӗн ҫинчен пынине кӗскен вырӑсла ӑнлантарса парсан, хӑйсем те ыйтусем пачӗҫ. Ҫапла вара, пӗр-пӗрин опычӗпе ылмашрӗҫ вӗсем.

Тӗл пулу вӗҫленнӗ май чӑваш филологийӗпе культура факультечӗн студенчӗсене дипломсемпе чысларӗҫ. Чӑваш профессорӗсемпе преподавателӗсене салам каларӗҫ мари тӗпчевҫисем. Туслӑ ҫыхӑну татӑлмасса, малалла тата ҫирӗпленессе шаннине пӗлтерчӗҫ вӗсем.

Конференци хыҫҫӑн ЧПУ хӗрӗсем Йошкар-Ола хулипе паллашрӗҫ. Мари республикин тӗп хулин паллӑ вырӑнӗсене ҫитсе курчӗҫ, асӑнмалӑх сӑн ӳкерӗнчӗҫ, сувенирсем туянчӗҫ. Ҫумӑр айне лексе йӗпенни те, ҫиллӗ ҫанталӑк та пӑсаймарӗ савӑк кӑмӑлӗсене. Мероприятипе экскурси пурне те килӗшрӗ.

#конференцисем, #кӳршӗре, #Мари Эл, #Чӑваш патшалӑх университечӗ, #Чӑваш филологийӗпе культура факультечӗ