Акан 14-мӗшӗнче ЧПУ-н чӑваш филологийӗпе культура факультечӗн ӗҫченӗсем И.Я.Яковлев ячӗлле Элӗкри пӗтемӗшле пӗлӳ паракан вӑтам шкулта иртнӗ «Чӑваш чӗлхипе литературине наци шкулӗсенче вӗрентесси» ятлӑ ӑслӑлӑхпа практика конференци ӗҫне хутшӑнчӗҫ. Конференцине В.К. Волков шкул директорӗ уҫрӗ. Районти вӗрентӳ управленийӗн пуҫлӑхӗн ӗҫӗсене вӑхатлӑх пурнӑҫласа пыракан И.П. Ильина салам сӑмахӗ тухса каларӗ. Элӗк районӗнчи шкулсенче чӑваш чӗлхипе литературине вӗрентекен учительсем умӗнче Г.А. Ермакова профессор «Чӑваш чӗлхипе литератури урӑ халӑх философийӗн тарӑнӑшне ҫитни» темӑпа, О.И. Печников доцент «Урок тӗллевӗсене палӑртассин уйрӑмлӑхӗсем» темӑпа, Г.Н. Семенова профессор «Чӑваш чӗлхи урокӗсенче сывлӑха упрамалли технологисемпе усӑ курасси» темӑпа, Э.И. Родионова аслӑ преподаватель «Литература вӗрентмелли теорин хӑш-пӗр енӗсем тата шкул вулавӗ» темӑпа, В.А. Милютин доцент «Паянхи чӑваш ташшин этнокультури» темӑпа тухса калаҫрӗҫ. Аслӑ шкул преподавателӗсем хӑйсен доклачӗсенче хускатнӑ ыйтусем ачасемшӗн те, вӗрентекенсемшӗн те кӑсӑклӑ пулчӗҫ, чӗрӗ калаҫу ҫуратрӗҫ. И.В. Софронова доцент профориентаци ыйтӑвӗсене хускатрӗ. Чӑваш филологийӗпе культура факультетӗнчи специализацисем, кунта вӗренме кӗмелли условисем ҫинчен каласа кӑтартрӗ.

Конференцине шкулти вӗрентевҫӗсем те хӑйсен доклачӗсемпе хутшӑнчӗҫ, хӑйсен ӗҫ опычӗпе, хумхантаракан ыйтусемпе палаштарчӗҫ. Конференци ӗҫне районти тӗп вулавӑш ӗҫченӗсем хатӗрленӗ «Силпи асамачӗ» композиципе тата чӑваш филологийӗпе культура факультечӗн студенчӗсем йӗркеленӗ концертпа вӗҫлерӗҫ.

Пухӑннисем ӗҫ тухӑҫлӑ, интереслӗ, усӑллӑ пулнине палӑртрӗҫ.

#Элӗк районӗ, #Элӗк, #шкулсем, #конференцисем, #Чӑваш филологийӗпе культура факультечӗ, #Чӑваш патшалӑх университечӗ