Ӑслӑлӑх конференцийӗнче

Акан 13-мӗшӗнче чӑваш филологийӗпе культура факультетӗнче 44-мӗш ӑслӑлӑхпа практика конференцийӗ иртрӗ. Ҫулсеренех иртекен уява кӑҫал Аслӑ Ҫӗнтерӳренпе — 65 ҫул тата Чӑваш Автономи Республикине тунӑранпа 90 ҫул ҫитнине халалланӑ. Йӑлана кӗнӗ мероприяти студентсемшӗн те, аспирантсемшӗн те пӗлтерӗшлӗ. Шӑпах ҫакӑнтан пуҫланать те наукӑпа кӑсӑкланасси, малаллахи пурнӑҫа унпа ҫыхӑнтарасси. Никам та тӳрех преподаватель-профессор пулса тӑмасть. Ку шухӑша факультет деканӗ В.Г. Родионов та палӑртрӗ. Кафедра пуҫлӑхӗсем пурне те ӑнӑҫу сунчӗҫ.

23 секци ӗҫлерӗ, 300 ытла доклад. Вӗсен пахалӑхӗ ҫулсерен ӳссех, хутшӑнакансен ӑсталӑхӗ туптансах пырать. 2-4 докладпа калаҫма ӗлкӗрекенсен йышӗ те чылай. Кашниех хӑй пултарулӑхӗпе ӑс ҫивӗчлӗхне кӑтартрӗ.

Хӑнасем те йышлӑн килнӗ кӑҫал: Мари, Тутар, Удмурт университечӗсен тата Шупашкарпа Канашри педагогика колледжӗсен студенчӗсем, Г. Лебедев ячӗллӗ лицейри тата Элӗк шкулӗнчи вӗренекенсем. Пурне те тарават кӗтсе илчӗ университет. Вӗсен доклачӗсемпе паллашма питӗ кӑсӑклӑ пулчӗ. Хӑйсене мӗнле йышӑннипе тата конференципе кӑмӑллине пытармарӗҫ хӑнасем. Тутарсемпе удмуртсем чӗлхисене хуҫса та пулин, ҫапах чӑвашла сывлӑх сунчӗҫ. Тӑвӑллӑн алӑ ҫупса кӗтсе илчӗ ку кӗтменлӗхе аудитори. Парнесемпе, ыр сӑмахсемпе улшӑнчӗҫ факультет ӗҫченӗсемпе хӑнасем. Студентсемпе вӗренекенсене дипломсемпе чысларӗҫ.

Ҫапла вара, чӑваш филологийӗпе культура факультетӗнче Наука кунӗ ӑнӑҫлӑ иртсе кайрӗ. Анчах наука ӗҫӗ кун ҫинче чарӑнса лармасть. Малалла — ҫӗнӗ тӗпчевсемпе шыравсем, опытсемпе тӗрӗслевсем. Тепӗр ҫул та конференци пулать-ҫке. Ҫунана вара — ҫулла, урапана — хӗллех хатӗрлеме хушнӑ.

Тӗплӗнрех

#Чӑваш филологийӗпе культура факультечӗ, #Чӑваш патшалӑх университечӗ, #ӑслӑлӑх, #Элӗк, #Канаш, #Шупашкар, #университетсем