Пушӑн 27-мӗшӗнче, Пӗтӗм тӗнчери театр кунӗнче, Вырӑс патшалӑх драма театрӗнче «Чӗнтӗрлӗ чаршав» конкурс ҫӗнтерӳҫисене чысланӑ. Чи малтанах ЧР культура министрӗ Вадим Ефимов сцена ӑстисене уявпа саламланӑ.

Кӑҫал жюрипе куракансем пуш уйӑхӗ тӑршшӗпех чи лайӑх спектакльсемпе киленме пултарнӑ. Камсем ҫӗнтерӳҫӗ пулса тӑнӑ-ха?

«Ҫулталӑрки чи лайӑх спектакль (режиссура)» номинацире Чӑваш патшалӑх пукане театрӗнчи Юрий Филипповӑн «Ночь перед Рождеством» (Н.В.Гоголь) постановки ҫӗнтернӗ.

«Ачасем валли лартнӑ чи лайах спектакль» номинацире Иосиф Дмитриев «Кот в сапогах» постановкӑпа мала тухнӑ (Ҫамрӑксен театрӗ).

«Спектакле кӗвӗ тӗлӗшӗнчен чи лайӑх илемлетни» номинацире Чӑваш патшалӑх пукане театрӗнчи Юрий Григорьев «Ночи перед Рождеством» спектакльпе ҫӗнтернӗ.

«Чи лайӑх сценографи» номинацире Светлана Зверева «Синкерлӗ шӑпа» спектакле илемлетнӗшӗн ҫӗнтернӗ (Чӑваш патшалӑх академи драма театрӗ).

«Хӗрарӑм рольне чи лайӑх калӑплакан» номинацире Вырӑс патшалӑх драма театрӗн артисчӗ Татьяна Яфанова «Бабочка… Бабочка» спектакльте Эдда рольне калӑпланӑшӑн тата Елизавета Хрисанфова «Синкерлӗ шӑпа» постановкӑра Лизавета ролӗшӗн ҫӗнтернӗ.

«Арҫын рольне чи лайӑх калӑплакан» ята «Нарспи» спектакльти Сетнера калӑпланӑшӑн Сергей Кузнецов (Чӑваш патшалӑх оперӑпа балет театрӗ) тата Сергей Павлов «Синкерлӗ шӑпа» спектакльти (Чӑваш патшалӑх академи драма театрӗ) Ананий Яковлев рольне вылянӑшӑн тивӗҫнӗ.

«Эпизодри чи лайӑх роль» номинацире Валентина Смирнова (Чӑваш патшалӑх оперӑпа балет театрӗ) «Нарспи» спектакльте Сетнер амӑшне калӑпланӑшӑн ҫӗнтернӗ.

Артистсем ятарлӑ дипломсене те тивӗҫнӗ.

Сӑнсем (20)

#Чӗнтӗрлӗ чаршав, #конкурссем, #театрсем, #пукане театрӗ, #культура, #ҫамрӑксен театрӗ, #вырӑс дарма театрӗ, #спектакльсем, #оперӑпа балет театрӗ