вӑйӑ саманчӗ

Иртнӗ шӑматкун, нарӑсӑн 6-мӗшӗнче, Тӑвай районӗн центрӗнче волейболистсен уявӗ пулчӗ. Ҫав кун спорткомплекспа Тӑвайри вӑтам шкулӑн спорт залӗсенче В.Г.Васильев кубокӗшӗн ҫивӗчрен те ҫивӗч ӑмӑртусем пычӗҫ. 9 команда таранах хутшӑнчӗ асӑну турнирне: Шупашкарти «Дорстройпа» «Старко», Вӑрнар, Канаш, Комсомольски, Куславкка районӗсен, Тӑвайри «Дорстрой», Тушкилпе Тӑрмӑш ҫамрӑкӗсем.

Ӑмӑртусене хутшӑнакансене район пуҫлӑхӗ Н.Иванов саламларӗ. Васильев кубокӗ волейбол спортне аталантарас, сывӑ пурнӑҫ йӗркине пропагандӑлас енӗпе пысӑк пӗлтерӗшлӗ пулнине, кӑҫалхипе 10-мӗш хут иртнине палӑртрӗ. Ҫавӑн пекех ЧР Патшалӑх Канашӗн Председателӗн ҫумӗ Г.Васильев, депутатсен районти Пухӑвӗн председателӗ Ю.Алексеев тата Тӑрмӑш ял тӑрӑхӗн пуҫлӑхӗ В.Разин сӑмах каларӗҫ.

Чӑваш Республикин патшалӑх гимнӗпе уҫрӗҫ турнира. Пирвайхи тӗл пулура Тӑвай районӗпе Тӑрмӑш ялӗн ветеранӗсем вылярӗҫ, малалла — ушкӑнсем ҫине пайланса.

Ҫурма финалта «Старко» Тӑвайри «Дорстройран», Шупашкарти «Дорстрой» тушкилсенчен ҫӑмӑллӑнах выляса илчӗҫ. 3-мӗш вырӑншӑн пыракан кӗрешӳре тӑвайсем тушкилсене 2:1 шутпа парӑнтарчӗҫ.

Финалта шупашкарсем тӗл пулчӗҫ. «Старкон» вӑйӑ каймарӗ, республикӑри «Дорстрой» вара хавхаланса вылярӗ, 2:0 шутпа ҫӗнтерсе кӑҫалхипе 4-мӗш хут Васильев кубокне тивӗҫрӗ.

Турнирта мала тухнисене, ҫавӑн пекех чи ӑста волейболистсене дипломсемпе медальсем тата парнесем парса хавхалантарнӑ. Турнир йӗркелӳҫисем Вячеслав Георгиевич Васильев ҫемйине те парнесем панӑ.

Спорткомплексра буфет йӗркеленӗ, волейболистсене вӗри апат ҫитернӗ.

#Тӑвай районӗ, #спорт, #Тӑрмӑш, #Тӑвай, #волейбол