2015 ҫулхи кӑрлачӑн 9-мӗшӗнче Красноармейски районӗ 80 ҫул тултарнӑ ятпа ҫавра сӗтел иртнӗ. 1935 ҫулта район Трак районӗ ятпа йӗркеленнӗ, 1940 ҫулта унӑн ятне улӑштарса ӑна Красноармейски районӗ ят панӑ. Халӗ районти 9 ял тӑрӑхӗнчи 89 ялта 15,2 пин ҫын пурӑнать. Ҫавра сӗтел тавра районти предприяти пуҫлӑхӗсем, шкул тата культура ҫурчӗсен ертӳҫисем, райадминистраци ӗҫченӗсем тата ытти чылай ҫын хутшӑннӑ.

Пухӑва районти вӗренӳ пайӗн ертӳҫи Алексей Васильев уҫнӑ. Алексей Иванович пухӑннисене район кун-ҫулӗн паллӑ пулӑмсемпе паллаштарнӑ, район историйӗнче сумлӑ ят хӑварнӑ паттӑрсем ҫинчен, районта юлашки ҫулсенчи тунӑ ҫитӗнӳсем пирки чарӑнса тӑнӑ.

Ҫавра сӗтел хӑнисем «Трак ен — 80 ҫулта» хӑтлавпа (презентаципе) паллашнӑ.

Пухӑва районпа тантӑш ентеше те чӗннӗ. Яковлев Иосиф Яковлевич ӗҫ ветеранӗ шӑпах 1935 ҫулхи кӑрлачӑн 9-мӗшӗнче Мӑн Шетмӗ ял тӑрӑхӗнчи Кушар ялӗнче ҫуралнӑ.

2015 ҫулта районта ҫуралнӑ пӗрремӗш ачан ашшӗ-амӑшне — Прокопьев Константин Александрович ҫурални ҫинчен свидетельство панӑ.

Пухӑннисем умӗнче тӗрлӗ ҫулсенчи район ертӳҫисем — С.И. Железин, А.П. Никитин, Красноармейски районӗн Хисеплӗ гражданинӗ, ӗҫпе вӑрҫӑ ветеранӗ Михаил Прохорович Прохоров сӑмах каланӑ. Николай Ершов таврапӗлӳҫӗ хӑй ҫырнӑ сӑвӑпа паллаштарнӑ.

Районта ҫӗнӗ энциклопеди кӑларма хатӗрленеҫҫӗ. Унӑн тӗп редакторӗ Виталий Михайлов энциклопеди кӑларас ӗҫ еплерех пыни ҫинчен каласа кӑтартнӑ.

Пухӑннисене Красноармейски тата Чатукасси ял тӑрӑхӗнчи артистсем хитре юрӑ-кӗвӗпе савӑнтарнӑ.

Сӑнсем (27)

#Красноармейски, #Красноармейски районӗ, #юбилейсем, #ҫавра сӗтелсем, #Кушар, #Мӑн Шетмӗ ял тӑрӑхӗ, #Чатукасси ял тӑрӑхӗ