Концерта уҫнӑ самант

Шупашкарти Федор Павлов ячӗллӗ музыка училищи хӑйӗн 85 ҫулхине халалласа «Юлташсемпе пӗрле» халӑх инструменчӗсен уйрӑмӗн концертне пухнӑ. Унта баянпа, аккоредонпа вылякансем, хӗлӗхлӗ инструментпа вылякансем калакансем хутшӑннӑ.

Халӑх инструменчӗсем, уйрӑмах — баян, Раҫҫейре яланах анлӑ сарӑлнӑ тесе палӑртать Чӑваш Енӗн Культура министерстви. Шупашкарти музыкӑпа театр техникумӗн дирекцийӗ 1930 ҫултах гармоникӑпа халӑх инструменчӗсен класне сарассипе ҫав енӗпе штата анлӑлатасси пирки ыйту хускатнӑ-мӗн. Анчах ун чухне преподавательсене тупайман. Ку енӗпе уйрӑма 1945 ҫулта кӑна уҫайнӑ. Ҫавӑн хыҫҫӑн Чӑваш Енре халӑх инструмент искусствине сарма май килнӗ. Хальхи, юбилей концертӗнче, баянпа, аккордеонпа, тӑмрапа, балалайкӑпа, кӗслепе, гитарӑпа калакансем хӑйсен ӑсталӑхне пур енлӗн кӑтартнӑ.

Каҫа Раҫҫейӗн тата Чӑваш Енӗн культурӑн тава тивӗҫлӗ ӗҫченӗ, баянпа аккоредон уйрӑмӗн ертсе пыракан педагогӗ Александр Белянкин уҫнӑ. Унтан А. Вивальдипе И.С. Бахӑн a-moll концерчӗн финалне янӑратнӑ. Ӑна чуна тивертмелле выляканӗсем — Чӑваш Республикин тава тивӗҫлӗ артисчӗ Сергей Баранов ертсе пыракан ансамбль. Йыша Яков Федоров баянист, Валерий Калмыковпа Павел Батищев аккордеонистсем, Константин Матюшин бас-гитарист, ҫапса каламалли музыка инструменчӗсемпе калакан Назыр Гараев кӗнӗ.

Концертра асра юлмалли ытти номер те пайтах пулнӑ. Ӑсталӑх енчен студентсем те юлман темелле. Ҫавсен шутӗнче нумай хӗлӗхлӗ музыка инструменчӗпе калакансен пӗтӗм тӗнчери пӗрремӗш конкурсӗнче нумаях пулмасть лауреат пулса тӑнӑ Кристина Шегурована та палӑртмалла. Вӑл чӑваш кӗслипе каланӑ. Хӗр Филипп Лукинӑн «Шур перчетке» хайлавне чуна тивмелле вылянӑ. Кристина Раҫҫейӗн тата Чӑваш Республикин культурӑн тава тивӗҫлӗ ӗҫченӗн Эдуард Борисовӑн класӗнче вӗренет иккен.

Сӑнсем (16)

#музыка училищи, #юбилейсем, #пултарулӑх, #Шупашкар, #культура