Сербинчи кураври кӗнекесем

Раҫҫейӗн кӗнеке кӑлараканӗсен ассоциацийӗн йышӗнче Чвӑаш кӗнеке издательстви юпан 26-мӗшӗ–чӳкӗн 2-мӗшӗсенче Сербинче пулнӑ. Унта Белгородри 59-мӗш кӗнеке куравӗ ӗҫленӗ. Курава Чӑваш кӗнеке издательствин пуҫлӑхӗ Валерий Комиссаров хутшӑннӑ. Чӑвашсемсӗр пуҫне йышра мускавсем, питӗрсем, чулхуласем пулнӑ.

Пирӗн издательство кӗнекисем куравӑн пӗрремӗш кунхинех ҫынсене кӑсӑклантарнӑ-мӗн. Белградри Раҫҫейӗн ӑслӑлӑхпа культура центрӗнче пулнӑ чух унти университетӑн преподавателӗсемпе студенчӗсем, ҫыравҫӑсем наци ҫыравҫисемпе поэчӗсемпе кӑсӑкланнине кӑтартса панӑ. Вӗсем Геннадий Айхин «Собрания сочинений» томӗсемпе паллашнӑ, Петӗр Хусанкай пирки аса илнӗ.

Вырӑс ҫурчӗн вӗренӳ программисен пуҫлӑхӗ Илья Тяпкин Чӑваш кӗнеке издательствинче кун ҫути куракан ҫӗнӗ кӗнекесем пирки хӑйсен сайтӗнче пӗлтерсе тӑма шантарнӑ.

Чӑваш кӗнеке издательствин пуҫлӑхӗ Валерий Комиссаров ун пек куравсем хӑнӑхнӑ ӗҫе ҫӗнӗлле хаклама май панине пӗлтернӗ. «Белый город» издательствӑпа, сӑмахран, ача-пӑча кӗнекисене чӑвашларан вырӑсла, вырӑсларан чӑвашла куҫарма калаҫса татӑлнӑ-мӗн.

«Молодая гвардия» издательствӑпа вара паллӑ ҫынсене халалласа пӗрлехи проект пуҫарассине сӳтсе явнӑ. Унта «Жизнь замечательных людей» сери кӑлараҫҫӗ, пирӗн патра — «Замечательные люди Чувашии». Икӗ ырӑ утӑма пӗрлештерсе пысӑк ӗҫ тусан тата аван пулмалла.

Вырӑс православи чиркӗвӗн ҫыннисемпе калаҫнӑ хыҫҫӑн тӗн урокӗсене шкулсенче тата вырсарни шкулӗсенче вӗрентме кирлӗ кӗнекесем кӑларас шухӑш патне ҫитсе тухнӑ.

Сербинче Чӑваш кӗнеке издательствин «Из опыта народных мастеров» серинчи кӗнекисен хӑтлавӗ те иртнӗ.

#Чӑваш кӗнеке издательстви, #Серби, #куравсем, #кӗнекесем