Трак ен тӑрӑхӗнче Красноармейски районӗнчи Янкас ялӗнче ҫуралса ӳснӗ чӑвашсен паллӑ поэчӗ Нестер Янкас ҫуралнӑранпа 100 ҫул ҫитнине халалланӑ ӗҫсем вӗҫленмен-ха. Акӑ, хальхи кунсенче республикӑри районсем хушшинче шкул ачисен Интернет урлӑ ирттерекен инҫет викторина пырать. Ӑна йӗркелекенӗ — Красноармейски иккӗмӗш шкулӗнче чӑваш чӗлхипе литератури вӗрентекен, Нестер Янкас ячӗллӗ Преми лауреачӗ Виталий Михайлович Михайлов. Паянхи куна 59 хурав килнӗ те ӗнтӗ. Викторина Чӑваш чӗлхи кунӗ умӗн ака уйӑхӗн 23-мӗшӗнче вӗҫленет.

Ака уйӑхӗн 6-мӗшӗнчен пуҫласа 23-мӗшӗччен районти шкулсенче чӑваш чӗлхине чи лайӑх пӗлекен аслӑ класра вӗренекенсем хушшинче "Ҫамрӑк ӑсчах" вӑйӑ-конкурс иртмелле. Вӑл виҫӗ турпа иртет. Пӗрремӗш турӗ шкулсенче иртет, унта шкулти чӑваш чӗлхине чи лайӑх пӗлекен ачана суйласа илеҫҫӗ. Иккӗмӗш турта вара виҫҫӗмӗш тура лекессишӗн тупӑшаҫҫӗ. Виҫҫӗмӗш турӗ ака уйӑхӗн 23-мӗшӗнче пулать. Вӑл чӑваш чӗлхине чи лайӑх пӗлекен 5 ача хушшинче иртӗ. Ку конкурса та Виталий Михайлович Михайлов учитель йӗркелесе пырать.

Ака уйӑхӗн 23-мӗшӗнче Красноармейски иккӗмӗш шкулӗнче пысӑк уяв пулать. Ӑна Чӑваш чӗлхи кунне тата чӑваш чӗлхин вунӑкунлӑхне халалланӑ. Уява пичет ӗҫченӗсем, Нестер Янкас ячӗллӗ Преми лауреачӗсем, "Кӑмӑл" литературӑпа краеведени вӗренӳ пӗрлешӗвӗн членӗсем хутшӑнаҫҫӗ.

Ака уйӑхӗн 25-мӗшӗнче вара чаплӑ лару-тӑрура инҫет викторинӑпа вӑйӑ-конкурса пӗтӗмлетеҫҫӗ.

#Нестор Янкас, #юбилейсем, #Янкас, #Красноармейски, #Красноармейски районӗ, #ӑмӑртусем, #конкурссем