Кӑҫалхи кӑрлачӑн 1-мӗшӗ тӗлне Чӑваш Енри халӑх йышӗ 1 миллион та 240 пин ҫынпа танлашнӑ. Ку вӑл 2011 ҫулхинчен 10 пин те 534 ҫын, е 0,8 процент, чакнине пӗлтерет.

Ялта пурӑнакансен шучӗ ҫулталӑкра 6 пин ҫын (1,2 процент) сахалланнӑ, хуларисен 2,6 пин (0,3 процент) нумайланнӑ. Халӑхӑн йышӗнче хула ҫыннисем 60,2 процент йышӑнаҫҫӗ, ялтисем — 39,8 процент.

Юлашки вӑхӑтра ачасем ҫураласси йышланнӑ. 2013 ҫулта 2011-мӗшӗнчинчен 1 186 пепке ытларах кун ҫути курнӑ: пӗлтӗр 17 пин 351 ача ҫуралнӑ. Ҫураласлӑх коэффициенчӗ 8,5 процент хушӑннӑ. Ялта хуларинчен яланхиллех нумайрах ҫуратаҫҫӗ.

Пӗлтӗр халӑх шучӗ Шӑмӑршӑ, Елчӗк, Улатӑр, Етӗрне, Патӑрьел, Ҫӗмӗрле районӗсенче уйрӑмах чакнӑ. Вӗсенче йыш 3 процентран пуҫласа 2,2 процент таран катӑлнӑ. Шупашкар, Канаш, Ҫӗнӗ Шупашкар хулисемпе Шупашкар районӗнче халӑх шучӗ йышланнӑ.

Ӗҫлеме пултарайманнисем яллӑ вырӑнта хуларинчен 1,3 процент нумайрах. Ансат чӗлхепе каласан, ҫак цифра ялта ватӑсем ытларах пурӑнаҫҫӗ тенине пӗлтерет. Ҫулланнисен йышӗ тӗп хуларан инҫетре вырнаҫнӑ Пӑрачкав, Улатӑр, Елчӗк, Хӗрлӗ Чутай, Ҫӗмӗрле, Куславкка районӗсенче уйрӑмах йышлӑ. Шупашкар, Канаш, Ҫӗнӗ Шупашкар хулисенче, Шупашкарпа Йӗпреҫ районӗсенче ҫамрӑксем ытларах.

#статистика, #халӑх йышӗ, #Шупашкар, #Ҫӗнӗ Шупашкар, #Канаш, #Шупашкар районӗ, #Шӑмӑршӑ районӗ, #Елчӗк районӗ, #Улатӑр районӗ, #Етӗрне районӗ, #ачасем, #ҫамрӑксем, #ватӑсем