9-мӗш Аслӑ пухура. Тимӗр Акташ ӳкернӗ сӑн

Ӗнер 15:00 сехетре Чӑваш наци вулавӑшӗнче Чӑваш наци конгресӗн черетсӗр IX Аслӑ пухӑвӗ иртнӗ. Ун умӗн, 10 сехетре, Мӑн Канаш пухӑннӑ. Анчах вӑл хупӑ мелпе иртнӗ, Тимӗр Акташ журналист пӗлтернӗ тӑрӑх ӑна унта кӗртмен.

Аслӑ Пухура икӗ ыйту сӳтсе явнӑ — ҫӗнӗ Устава йышӑнассине тата «Чӑваш халӑхӗшӗн тунӑ тивӗҫлӗ ӗҫсемшӗн» медале ҫирӗплетессине. «Хыпар» хаҫат пӗлтернӗ тӑрӑх Раҫҫейӗн 22 тӑрӑхӗнчен тата чикӗ леш енчи патшалӑхсенчен пурӗ 53 делегат хутшӑнмалла пулнӑ. Ҫавӑн пекех республикӑн кашни районӗ 2-шер делегата яма тивӗҫнӗ.

Уставне Николай Лукианов хатӗрленӗ. Мӗншӗн ҫӗнетме тивни пирки, мӗн улшӑнни пирки вӑл халӑх умне тухса доклад каланӑ. Хӑй сӑмахӗнче вӑл пурнӑҫ улшӑнни пирки пӗлтернӗ — экономикӑра та, политикӑра та, кашни сферӑра тенӗ пекех — ылмашусем пулса иртнӗ. Унсӑр пуҫне обществӑлла организацисене йӗркелекен саккунсем те ҫӗнелсех тӑраҫҫӗ. Ҫакна пула ҫӗнӗ Устав ҫырма тивнӗ те. Николай Лукианов ҫавӑн пекех унчченхи уставпа танлаштарсан мӗнле улшӑнусем кӗни ҫинче те чарӑнса тӑнӑ. Аслӑ Пухӑвӗн делегачӗсем ҫӗнӗ Устав проектне пӗтӗмӗшле ырланӑ.

Тепӗр ыйтура «Чӑваш халӑхӗшӗн тунӑ тивӗҫлӗ ӗҫсемшӗн» медале ырларнӑ. Асилтеретпӗр: Чӑваш наци конгресӗ унӑн эскизне ятарлӑ конкурс ирттерсех йышӑнчӗ. Ман Канаш Ювенальевсен вариантне ҫирӗплетнӗ хыҫҫӑн халь ӗнтӗ Аслӑ Пуху та ӑна ырларӗ.

Президиум пайташӗ Николай Лукианов каласа панӑ тӑрӑх хупӑ Мӑн Канашра — вӑл маларах 10 сехетре иртнӗ — Устав тавра калаҫнӑ тата Президиумӗн пайташӗсен йышне пысӑклатнӑ. Президиума влаҫ органӗсенче ӗҫлекен тӗрлӗ тӳре-шарана кӗртнӗ иккен, ҫав шутра темиҫе министра. Унсӑр пуҫне Президиум йышне малашне Чӗмпӗр тӑрӑхӗн элчи те кӗрӗ — ку тивӗҫ Сваева лекнӗ пулас (кӑна ытти тӑрӑхсен — Тутарстанӑн, Пушкӑртстанӑн — элчисем пуррине пула сӗннӗ). Тӗрлӗ влаҫ ҫыннисене кӗртнине (ЧНК президенчӗ Угаслов хӑй сӗннӗ) ҫапларах сӑлтавлаҫҫӗ: уставра палӑртнӑ хӑш-пӗр тӗллев Чӑваш патшалӑхӗннисемпе пӗр килет. Хӑшӗ-пӗр ыйтӑвне вара влаҫ ҫыннисем тӗрев памасан, пулӑшмасан пурнӑҫа кӗртме те йывӑр. Ҫапла май Президиум йышне 5–6 ҫӗнӗ ҫын кӗнӗ.

Сӑмах май, ҫӗнӗ Устав проекчӗпе ЧНК сайтӗнче паллашма пулать.

#вулавӑшсем, #наци вулавӑшӗ, #Мӑн Канаш, #пухусем, #чӑвашлӑх, #ЧНК, #тӳре-шара, #Чӗмпӗр облаҫӗ