Ҫу уйӑхӗн 9-11-мӗшӗсенче Шупашкарта иртекен XXIII Тӗнче кубокӗччен шутлӑ кунсем ҫеҫ юлчӗҫ. Хатӗрленӳ ӗҫӗсем палӑртнӑ планпа килӗшӳллӗн пыраҫҫӗ. Эпир вара хӑвӑрт утас енӗпе пысӑк ҫитӗнӳсем тунӑ ентешӗмӗрсенчен, тӗнчипе паллӑ спортсменсенчен вӗсем Тӗнче кубокӗ пирки мӗн шухӑшланине ыйтса пӗлес терӗмӗр.

Елена Николаева, Олимп чемпионки:

- XXIII Тӗнче кубокӗ шӑпах пирӗн республикӑра - Шупашкарта - иртнишӗн эпир пурте питӗ мухтанатпӑр, мӑнаҫланатпӑр. Пирӗншӗн ку - пысӑк чыс. Пысӑк мероприятире хам хутшӑнманнишӗн кӑшт пӑшӑрханатӑп, паллах, ҫапах та ҫак ӑмӑрту маншӑн - чӑн-чӑн уяв. Кубокра Чӑваш Ен чысне хӳтӗлекен тӑватӑ спортсмен халӗ мӗн тери хумханнине питӗ лайӑх ӑнланатӑп. Ҫӗршыв чысне тӑван килте хӳтӗлеме тата йывӑртарах-ҫке, ку - пысӑк яваплӑх. Эпӗ вӗсене пурне те ӑнӑҫу сунатӑп.

Владимир Андреев, Олимп вӑййисен призерӗ:

- Спортра ялан ӗҫлемесӗр, тренировкӑсене ҫӳремесӗр, тарламасӑр пысӑк ҫитӗнӳсем тума май килмест. Хӑвӑрт утассипе XXIII Тӗнче кубокне Раҫҫейӗн пысӑк хулисенче мар, шӑпах Чӑваш Енре ирттерме палӑртни пӗтӗм чӑваша мӑнаҫлантарать. Ку пирӗншӗн - чыс. Ҫак уява пурте чӑтӑмсӑррӑн кӗтеҫҫӗ, пирӗн спортсменсем ҫӗнтерессе шанаҫҫӗ, пӗтӗмпех йӗркеллӗ пуласса ӗненеҫҫӗ.

Александра Деверинская, тӗнче тата Европа рекордсменки:

- Тӗнче кубокӗ пирӗн патра иртни Чӑваш Республикинче пурӑнакансемшӗн питӗ пысӑк чыс. Ҫак ӑмӑртӑва хӑйсем патӗнче ирттерессишӗн нумай ҫӗршыв тӑрӑшрӗ, ИААФ канашӗ вара Чӑваш Ене суйласа илчӗ. Кубока Шупашкара «илсе килнӗшӗн» ЧР Президентне, хӑвӑрт утас енӗпе пысӑк ҫитӗнӳ тунӑ ентеш спортсменсене тав тӑвас килет. Пысӑк ҫак ӑмӑртӑва хутшӑнакан спортсменсене вара чӑваш ятне ҫӳлти шайра тытса пыма, пирӗн ӗҫе малалла та тивӗҫлипех тӑсма телей сунас килет.

Хыпар ҫӑлкуҫӗ

#Тӗнче кубокӗ-2008, #спорт