«Контактри» сӑн

Чӑваш Енре «Кӗр парнисем» ял хуҫалӑх ярмӑрккисем икӗ кун кӑна ӗҫленӗ-ха. Анчах ҫак икӗ кунра республикӑри фермерсем 69 тонна продукци сутма ӗлкӗрнӗ.

Аса илтерер: авӑн уйӑхӗн 12-мӗшӗнче республикӑра йӑлана кӗнӗ «Кӗр парнисем» ярмӑрккӑсем ӗҫлеме тытӑннӑ. Унта ҫитсе пахча-ҫимӗҫ, аш-какай, сӗт юр-варӗ, кӗрпе таврашӗ, пыл йӳнӗрехпе туянма май пур. Таварсем лавккаринчен самай йӳнӗрех, мӗншӗн тесен сутуҫӑсене вырӑнсемпе тӳлевсӗрех тивӗҫтереҫҫӗ.

Ярмӑккӑра, сӑмахран, ҫӗр улми — 21,5%, сухан — 31,4%, кӑшман — 41,1%, кишӗр 25,7% йӳнӗрехпе туянма пулать.

Каласа хӑварар: «Кӗр парнисем» ярмӑрккӑсем кашни канмалли кун юпа уйӑхӗн 4-мӗшӗччен ирхи 9 сехетрен пуҫласа кӑнтӑрла иртни 2 сехетчен ӗҫлӗҫ. Ватӑсене нимеҫӗсем пулӑшаҫҫӗ, тавара киле ҫитерсе параҫҫӗ.

#ял хуҫалӑхӗ, #ярмӑрккӑсем