Паян чӑваш парламенчӗн спикерӗ Юрий Попов, Олег Мешков вице-спикер тата Николай Маловпа Игорь Кушев депутатсем журналистсемпе тӗл пулчӗҫ. Калаҫӑвӑн тӗп теми Чӑваш Патшалӑх Канашӗн черетлӗ тапхӑрне сӳтсе явасси пулчӗ. Астӑвакансем каланӑ тӑрӑх, кун пек мелпе тӗлпулу йӗркелени унччен пулман. Калаҫӑва спикер журналистсене республикӑн саккунсем кӑларакан органне тимлӗх уйӑрнӑшӑн тав тунинчен пуҫларӗ.

Тӗлпулӑва пынӑ МИХсен ӗҫченӗсенчен депутатсем, ӑнланнӑ тӑрӑх, ҫивӗч ыйту самай парасса кӗтнӗн туйӑнчӗ. Ҫапах та, ӗҫтешӗмсем ан кӳренччӗр те, анчах «шӑллӑ» ыйту хускатакансем сахалрах пулчӗҫ. Кӑсӑклӑраххисен шутне, ман шутпа, «халӑх тарҫисене» тӗрлӗ блогра, Интернет-кӑларӑмсенче хурланине вӗсем епле йышӑнни; мӗншӗн хӑш-пӗр депутат сесси вӑхӑтӗнче ҫине-ҫинех сӑмах калани, теприсем вара ҫӑвара шыв сыпнӑн ларни пирки; саккун проекчӗсене ытларах чух Чӑваш Ен Элтеперӗ сӗнни депутатсем пуҫаруллӑ маррине пӗлтермест-и; парламентӑн пӗр-пӗр сессине чӑвашла ирттерме шухӑшламастӑр-и тесе кӑсӑкланнине тата ҫавӑн йышши хӑш-пӗр саманта кӗртмелле-тӗр.

Чӑвашла ирттересси пирки каласан, «маншӑн, Чӑваш Енре ҫуралса ӳснӗ, кунта пурӑнакан, ялан чӑвашла калаҫакан ҫыншӑн (ҫемьере ман виҫӗ ача, виҫҫӗшӗ те чӑвашла калаҫаҫҫӗ, арӑмпа та чӑвашла калаҫатпӑр) чӑвашла калаҫма, ертсе пыма питӗ ҫӑмӑл, кӑмӑллӑ. Ҫав вӑхӑтрах пирӗнпе юнашар ытти чӗлхепе калаҫакан ҫынсем лараҫҫӗ. Патшалӑх Канашӗн сессине ирттернӗ вӑхӑтра ҫавӑнпа та вырӑслах калаҫмалла пуль тесе шухӑшлатӑп», — тесе хуравларӗ Юрий Попов. «Чӑвашла вӗрентмелле вӗсене», — тесен Юрий Алексеевич ирӗксӗр вӗрентме май ҫуккине: кашнин хӑйӗн кӑмӑлӗ пулнине палӑртрӗ. Тӗслӗх вырӑнне спикер РФ Патшалӑх Канашӗн депутатне Алена Аршиновӑна илсе кӑтартрӗ — калаҫӑва хайхи чӑвашла пуҫлать иккен. Апла тӑк вӗренесси ҫынтан, унӑн кӑмӑлӗнчен килет. "Чӑваш Республикинче пурӑнакан халӑх чӑваш чӗлхине пӗлни ҫав халӑха сума сунине пӗлтерет", - терӗ Юрий Алексеевич.

Сӑнсем (36)

#тӗлпулусем, #журналистсем, #депутатсем, #тӳре-шара