Раҫҫей Следстви комитечӗн тӗпчевҫисем Вӑрмар район ҫыннин тӗлӗшпе пуҫиле ӗҫ пуҫарнӑ. 45 ҫулти арҫын азартлӑ (кӑмӑл хӗрсе каймалли) вӑйӑ йӗркеленӗ тесе шухӑшлаҫҫӗ.

Тӗпчевҫӗсем хальлӗхе палӑртнӑ тӑрӑх, Вӑрмар районӗнче пурӑнакан арҫын Канашра 2019 ҫулхи чӳк уйӑхӗнчен пуҫласа 2020 ҫулхи пуш уйӑхӗччен вӑйӑ заведенине ӗҫлеттернӗ. Ун валли вӑл пурӑнмалли мар ҫуртра пӳлӗм тара илнӗ. Унта 14 компьютер вырнаҫтарнӑ.

Тӗпчевҫӗсем халӗ пуҫиле ӗҫе малалла тишкереҫҫӗ. Вӗсем арҫын вӑйӑ заведенине уҫнипе мӗн чухлӗ тупӑш илнине палӑртӗҫ.

РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, азартлӑ вӑйӑ заведенине Шалти ӗҫсен министерствин Канашри йӗрке хуралҫисем тупса палӑртнӑ.

#тӗпчевҫӗсем, #пуҫиле ӗҫсем, #яваплӑх, #Шупашкар, #Вӑрмар районӗ, #пӑтӑрмахсем, #ШӖМ, #Канаш