Пуш уйӑхӗн 25-мӗшӗнче Кемӗрте хӑрушӑ пушар пулнӑ хыҫҫӑн Раҫҫейӗпех пушар хӑрушсӑрлӑхне тӗрӗслеҫҫӗ. Ултавҫӑсем тӗлӗрмеҫҫӗ: ҫакӑнпа усӑ курса пуясшӑн.

Ака уйӑхӗн 6-мӗшӗнче Канаш хулинче палламан ҫын вырӑнти хӑна ҫурчӗн директорӗ патне шӑнкӑравланӑ та хӑйӗнпе пушар инспекцийӗн ӗҫченӗ тесе паллаштарнӑ. Унтан вӑл 20 пин тенкӗпе пушар хӑрушсӑрлӑхӗн докуменчӗсене хатӗрлесе пама шантарнӑ. Директор ырӑ мар сиснӗ те кун пирки полицие пӗлтернӗ.

Палӑртмалла: ку Чӑваш Енре пӗртен-пӗр тӗслӗх мар. Халӗ лару-тӑрӑва тӗпчеҫҫӗ.

Аса илтерер: Кемӗрте суту-илӳ центрӗ ҫуннӑ, унта 64 ҫын вилнӗ. Инкек хыҫҫӑн Раҫҫейри суту-илӳ центрӗсене тата ытти учреждение тӗрӗслеме пуҫланӑ.

#Канаш, #полици, #ултавҫӑсем