Сулахайри — Татьяна Акимова

Ӗнер Кӑнтӑр Корейӑра Хӗллехи Олимпиада пуҫланчӗ. Пӗр ӑмӑрту тепринчен кӑсӑклӑрах. Ӗнер ирпе, сӑмахран, конькипе ярӑнакансен пултарулӑхне курса киленме май килчӗ. Паян, тӗслӗхрен, биатлонисткӑсем 7,5 километра старта тухрӗҫ. Тӗнчери чи маттур спортсменсем хушшинче пирӗн ентешӗмӗр Татьяна Акимова та пуррине черетлӗ хутчен кӑмӑлтан палӑртатпӑр.

Олимпиадӑри биатлон спринтӗнче Татьяна Акимова тӗл пенипе палӑрчӗ. Кашни мишенех лектерме пултарчӗ вӑл. Финиша чи лайӑх 20 биатлонистка йышӗнче ҫитрӗ.

Биатлон ӑмӑртӑвӗсем татах та пулӗҫ-ха.

Унсӑр пуҫне пирӗн республикӑри тепӗр спортсмен, Лана Прусакова фристайлистка, слоуп-стайл енӗпе нарӑсӑн 17-мӗшӗнче ӑмӑртӗ.

Аса илтерер, Хӗллехи Олимпиадӑна чӑваш спортсменӗсем 42 ҫул хутшӑнман. 2014 ҫулта Сочире иртнӗ вӑййа Елена Муратова могулистка ҫеҫ ҫӗршывӑн пӗрлештернӗ командипе кайнӑччӗ.

#спорт, #Олимп вӑййисем, #ӑмӑртусем, #Кӑнтӑр Корея, #Пхенчхан