Куславкка районӗнчи паллӑ фермер Василий Семенов 2009 ҫултанпа купӑста фестивальне ирттерет. Малтан ӑна Карач ял тӑрӑхӗнче йӗркеленӗ, унтан вӑл Куславкка хулине куҫнӑ, республика шайне ҫитнӗ.

Кредит илсе пысӑк стройка пуҫланӑран Василий Николаевич уяв тума кӑҫаллӑха тӑхтас, ӑна ҫитес ҫула куҫарас тӗллевлӗччӗ. Раҫҫей ял хуҫалӑх банкӗн Чӑваш Енри филиалӗ вара вӑй-халне шеллемен фермера пулӑшма шухӑшларӗ. Ҫапла май вара кӑҫалхи фестиваль Шупашкарта иртрӗ.

Василий Николаевичӑн ырӑ пуҫарӑвне малалла аталантарса банк пархатарлӑ ӗҫ турӗ. Халӑх йӑлине манӑҫтарманни ҫитӗнекен ӑрушӑн уйрӑмах пӗлтерӗшлӗ. Пӗрле пуҫтарӑнса купӑста тӳсе йӳҫӗтесси ӗлӗкех пулнӑ, вӑл чӑн-чӑн уява ҫаврӑннӑ. Чӑваш кирек мӗнле ӗҫе те пӗччен-иккӗн мар, йышпа (нимелле) пурнӑҫланӑ. Ҫавӑнпа ывӑннине туйман, ӗҫӗ те ӑннӑ. Хамӑр ҫитӗнтернӗ экологи енчен таса пахча ҫимӗҫе йӑран ҫинченех йӳнӗпе сутни мӗн усси? Ӑна вырӑнта тирпейлесе хӗл каҫипе тупӑшлӑ вырнаҫтарни лайӑхрах. Ҫакӑн ҫинчен те пычӗ калаҫу уявра, малта пыракан опытпа та паллашрӗҫ.

Фестивале хӑйӗн патӗнче йӗркелени банкшӑн та усӑллӑ пулчӗ. Кунта республикӑри фермерсем, пахча ҫимӗҫ ҫитӗнтерекенсем пухӑннӑ. Филиал вӗсемпе «ҫавра сӗтел» йӗркелерӗ, конференци ирттерчӗ. Хресчен хуҫалӑхӗсене йӗркелеме пулӑшас, кредитсем илме явӑҫтарас тата тӗрлӗ ыйту хускатрӗ.

Сӑнӳкерчӗксем

#фестивальсем, #ял хуҫалӑхӗ, #Куславкка районӗ, #Шупашкар, #Карач ял тӑрӑхӗ