Нумаях пулмасть Пушкӑртстанӑн Ермеккей районӗ регионти тӗрлӗ культурӑсен тӗп центрне ҫаврӑнчӗ. Ҫулсерен ҫак тӑрӑх Ик регионӗнче пурӑнакан халӑхсен «Земля предков» (чӑв. «Асаттесен ҫӗрӗ») фестивальне ирттерет. Кӑҫал шучӗпе вӑл — вуннӑмӗш. Регион пӗлтерӗшлӗ уявра асӑннӑ тӑрӑхри ял Канашӗсен «Килӗшӳпе туслӑх ялӗ» наци ҫурчӗсене курма пулчӗ. Унта пушкӑрт‚ вырӑс‚ тутар‚ удмурт‚ украин тата мӑкшӑ халӑхӗсен культурисемпе паллаштарчӗҫ. Эрехӗррипе Хурамал ял хутлӑхӗсен ҫуртӗнче вара чӑваш кӗписем‚ тӗрленӗ тата шӑтӑкла ҫыхнӑ япаласем‚ палас тӗртмелли хатӗр‚ ҫатан‚ хӑмла хунавӗсем‚ ҫил арманӗ тата ыттине курава тӑратнӑччӗ. Пӗтӗмлетсе каласан‚ чӑвашлӑх тени кашни утӑмрах туйӑнчӗ.

Республикӑн 12 районӗнчи тата Эрӗнпур облаҫӗнчи хӑйпултарулӑх ушкӑнӗсен ӑсталӑхне Культура ҫуртӗнче компетентлӑ жюри хакларӗ. Кунта та тӗрлӗ халӑх ташши‚ юрри-кӗвви янӑрарӗ. Шел пулин те‚ чӑваш ушкӑнӗсенчен фестивальте Пелепейри «Илем» фольклор ансамбле ҫеҫ курма пулчӗ. Хӑйпултарулӑх ӑмӑртӑвӗ вӗҫленнӗ хыҫҫӑн вӗсем тӗрлӗ ялсене саланчӗҫ. Чӑвашсен Эрехӗрри (ял Канаш председателӗ В.В. Кожевников) тата Хурамал (С.И. Данилова) ялӗсем хӑнасене авалхи йӑлапа — ҫӑкӑр-тӑварпа тата сӑрапа — кӗтсе илчӗҫ‚ вӗри апатпа сӑйларӗҫ. Паллах‚ хӑйпултарулӑх ушкӑнӗсем те парӑмра юлмарӗҫ: ял халӑхне юрӑ-кӗвӗпе‚ ташӑсемпе савӑнтарчӗҫ‚ кӑмӑлӗсене палӑрмалла ҫӗклерӗҫ.

Асӑннӑ фестиваль тӗрлӗ наци хӑйпултарулӑх ушкӑнӗсен ӑсталӑхне тӗрӗслерӗ кӑна мар‚ вӑл тӗрлӗ чӗлхепе калаҫакан халӑхсене паллашма‚ пӗр тӗвве пухма‚ халӑхсен хушшинчи туслӑха ҫирӗплетме пулӑшрӗ.

#Пушкӑртстан, #Пелепей, #Ермеккей районӗ, #Эрехӗрри, #Хурамал