Пӗтӗмӗшле пӗлӳ паракан Чӑваш Сурӑм вӑтам шкулти конференцире

Акан 26-мӗшӗнче Элӗк районӗнчи Чӑваш Сурӑмри пӗтӗмӗшле пӗлӳ паракан вӑтам шкулта «Чӑваш чӗлхи — тӑван чӗлхе, ялан эс пирӗн чӗрере!» темӑпа районти чӑваш чӗлхипе литература вӗрентекенсен ӑслӑлӑхпа практика конференцийӗ иртрӗ. Унта ЧПУн чӑваш филологийӗпе культура факультечӗн ӗҫченӗсем те хастар хутшӑнчӗҫ. Чи малтан 4 курс студентки Инна Данилова 6 класра уҫӑ урок пачӗ. Унтан Г.А. Ермакова профессор, О.И. Печников, И.Ю. Кириллова, А.С. Егорова доцентсем, Э.И. Родионова аслӑ преподаватель методика ыйтӑвӗсемпе доклад турӗҫ. Докладсене сӳтсе явнӑ май учительсемпе преподавательсем тӗрлӗ ыйту ҫинче чарӑнса тӑчӗҫ, чӑваш чӗлхи пуласлӑхӗ вӗрентекенсенчен те килнине палӑртрӗҫ.

Тӗлпулун иккӗмӗш пайӗнче Чӑваш Сурӑм шкулӗн вӗренекенӗсем тата районти чӑваш чӗлхи вӗрентекенӗсем сӑвӑ илемлӗ вуласа тупӑшрӗҫ. Сумлӑ жюри членӗ, культурологи кафедрин доценчӗ И.И. Иванов, конкурса пӗтӗмлетнӗ хыҫҫӑн сӑвӑ вулас ӑсталӑхпа мастер-класс ирттерчӗ.

Конференци ӗҫне хутшӑннисем пӗр кӑмӑллӑн пулса ҫакӑн евӗр ӗҫлӗ тӗлпулӑва кашни ҫулах ирттерме палӑртрӗҫ.

#Чӑваш патшалӑх университечӗ, #чӑваш филологийӗпе культура факультечӗ, #Элӗк районӗ, #Чӑваш Сурӑм, #конференцисем, #чӑваш чӗлхи