Никифор Наумов саламлать

Кӗҫнерникун, акан 21-мӗшӗнче, Шупашкарта вырнаҫнӑ К.В. Иванов ячӗллӗ литература музейне халӑх лӑк тулли пухӑнчӗ — кунта Тамара Гурьева юрӑҫ 60 ҫул тултарнӑ ятпа пултарулӑх каҫӗ иртрӗ.

Халӑх артисткине саламлама Чӑваш патшалӑх академи капеллинчи ӗҫтешӗсем, кӗвӗҫӗсем, сӑвӑҫсем, ҫыравҫӑсем, ытти юрӑҫсем (ЧР тава тивӗҫлӗ артисчӗсем Геннадий Никифоров, Владимир Егоров, халӑх артистки Зоя Лисицина, РФ тава тивӗҫлӗ культура ӗҫченӗ Клара Чекушкина, тата ыттисем) килнӗ. Сӗнтӗрвӑрри район ентешлӗхӗн ертӳҫи Никифор Наумов та салам сӑмахӗсем каларӗ (юбиляр ачалӑхӗ ҫак районта иртнӗ). Тамара Изосимовнӑна саламлакансем чӑн та нумай пулчӗҫ — кашни парнепе, кашни чечекпе килнӗ.

Юрӑсӑр иртмерӗ паллах. Тамара Гурьева Филипп Лукин, Ф.С. Васильев, Юрий Шепилов, Ю.Д. Кудаков тата ытти композиторсен юррисене шӑрантарса пачӗ.

Тамара Изосимовна Гурьева 1951 ҫулхи акан 1-мӗшӗнче Ҫӗрпӳ районӗн Шуртавӑш ялӗнче ҫуралнӑ. Ачалӑхӗпе ҫамрӑклӑхӗ Сӗнтӗрвӑрри районӗнчи Октябрьски ялӗнче иртнӗ. 1973 ҫулта Шупашкарти музыка училищин дирижёрпа хор уйрӑмне вӗренсе пӗтернӗ. 1973-78 ҫулсенче Чӑваш паталӑх юрӑпа ташӑ ансамблӗн хорӗнче юрланӑ. 1978-92 ҫулсенче — Чӑваш Енӗн гостелерадио хорӗнче. 1992 ҫултанпа Чӑваш патшалӑх академи капеллинче юрлать.

1982 ҫулта Чӑваш АССРӗн тава тивӗҫлӗ артисчӗ ятне, 1995 ҫулта Чӑваш Республикин халӑх артистки ятне тивӗҫнӗ.

Сӑнсем: 1 пай (кӗскен, 15 сӑн), 2 пай (тулли, 42 сӑн)

#К.В. Иванов ячӗллӗ литература музейӗ, #Сӗнтӗрвӑрри районӗ, #юбилейсем, #пултарулӑх каҫӗсем, #Ҫӗрпӳ районӗ, #Октяюрьски, #Шуртавӑш