Ирина Калентьева

Рио-де-Жанейрора иртнӗ Олимп ваййине хутшӑннӑ чӑваш спортсменкине Ирина Калентьевӑна тата унӑн тренерне республика хыснинчен укҫа уйӑрса хавхалантарма йышӑннӑ. Хушӑва паян Чӑваш Ен Правительствин пуҫлӑхӗ Иван Моторин алӑ пуснӑ.

Аса илтеретпӗр, Патӑрьел районӗнчи Нӑрваш Шӑхаль ялӗнче ҫуралса ӳснӗ спортсменка финиша 17-мӗш ҫитнине Чӑваш халӑх сайчӗ пӗлтернӗччӗ.

Ирина Калентьева юлашки вӑхӑтра Мӑкшӑ Республикин чысне хӳтӗлесе пурӑнчӗ. Асӑннӑ республикӑри Олимп резервӗн шкулӗнче вӗренекен велочупуҫӑсемпе тӗл пулнӑ чух Ирина Калентьева тӑван тӑрӑхне кӳренсе калаҫнӑ. Тӗнче кубокне пилӗк хутчен ҫӗнсе илнӗ, тӗнче чемпионатӗнче икӗ хутчен мала тухнӑ, 2008 ҫулхи Олимп ваййинче бронза медале тивӗҫнӗ спортсмен Чӑваш Еншӗн 20 ҫул ытла ӑмӑртӑва хутшӑннине аса илнӗ май: «Официаллӑ ҫынсенчен мана пӗр ҫын та Риори Олимпиада умӗн ӑнӑҫу сунмарӗ», — тенӗччӗ.

Маларах асӑннӑ хушура Олимпиадӑна хутшӑннӑ Ирина Калентьевана 50 пин тенкӗ, унӑн тренерне Алексей Семенова 25 пин тенкӗ уйӑрма йышӑннӑ. Кунсӑр пуҫне спортсменка кӑҫалхи юпа уйӑхӗн 1-мӗшнчен тытӑнса ҫитес ҫулхи авӑн уйӑхӗн вӗҫӗччен уйӑхсерен 8-шар пин тенкӗ илсе тӑрӗ.

Сӑмах май каласан, Ирина Калентьева пирки хушура В. Ярды ячӗллӗ олимп резервӗн спорт шкулӗн спортсменки тесе каланӑ.

#Нӑрваш Шӑхаль, #спорт, #ӑмӑртусем, #тӳре-шара, #маунтинбайк, #Рио-де-Жанейро, #Элтепер, #укҫа-тенкӗ, #Патӑрьел районӗ, #Мӑкшӑ Республики