Лебедев Валериан Степанович

Паян чӑваш культуринче пысӑк йӗр хӑварнӑ Чӑваш Республикин халӑх артисчӗ Лебедев Валериан Степанович ҫут тӗнчерен уйрӑлса кайрӗ. Халӑхпа сывпуллашасси ыран, нарӑсан 8-мӗшӗнче К.В. Иванов ячӗллӗ Чӑваш патшалӑх академи драма театрӗнче иртӗ (вӑхӑтне каярах пӗлтерӗҫ).

Лебедев Валериан Степанович 1931 ҫулхм юпан 1-мӗшӗнче Шупашкар районӗнчи Салапай ялӗнче ҫуралнӑ.

1953 ҫулта Кейӳ патшалӑх консерваторийӗ ҫумӗнчи музыка училищине пӗтернӗ, унтан пӗлӗвне А.В. Луначарский ячӗллӗ театр ӳнерӗн патшалӑх институтӗнче (ГИТИС) ӳстернӗ. 1948-1949 ҫулсенче Ишлейри культура Ҫуртӗнче инструктор-массовик пулса ӗҫленӗ. К.В. Иванов ячӗллӗ Чӑваш патшалӑх академи драма театрӗн сцени ҫине 1954 ҫулта тухнӑ. 1969-1974 ҫулсенче Чӑваш патшалӑх музыка театрӗн (халӗ Чӑваш патшалӑх оперӑпа балет театрӗ) директорӗ пулнӑ. 1999 ҫултанпа Чӑваш академи драма театрӗнче музыка пайӗн заведующийӗ, 2003 ҫултанпа концертмейстер пулса ӗҫленӗ.

Республикӑри пултарулӑх ушкӑнӗсене те вӑл самай пулӑшса тӑнӑ. Вӑл тӑрӑшнипех В.И. Чапаев ячӗллӗ савутӑн арҫынсен хорӗ халӑх хорӗн ятне илме пултарнӑ.

#ҫухатусем, #К.В. Иванов ячӗллӗ Чӑваш патшалӑх академи драма театрӗ, #Шупашкар, #Шупашкар районӗ, #Салапай