Нарӑсӑн 8-мӗшӗнче, «Чӑваш бройлерӗ» кайӑк-кӗшӗк хапрӑкӗпе ҫыхӑннӑ ӗҫ-хӗле Чӑваш Енӗн Арбитраж судӗнче пӑхса тухассине эпир пӗлтернӗччӗ.

Аса илтеретпӗр, суда тавӑҫпа тухаканни — республикӑн Пурлӑх комитечӗ. Вӑл хапрӑкӑн директорӗ Алексей Подорванов тӗлӗшпе тавӑҫ шӑрҫаланӑ. Суда тухнӑ хутра патшалӑх комитечӗ «Чӑваш бройлерӗ» пуҫлӑхӗнчен 14 миллион тенкӗ шыраса илес кӑмӑллине палӑртнӑ. Кунсӑр пуҫне ҫав ведомство Краснодар енӗнчи Арбитраж судне те ҫитнӗ. Унта вӑл «Чӑваш бройлерӗ» акционерсен обществине «Каневӑри ҫӑкӑр продукчӗсен комбиначӗ – инвест» тулли мар яваплӑ общество туяннипе килӗшменнине палӑртнӑ.

Тавӑҫҫӑ судра ӑнлантарнӑ тӑрӑх, предприяти Курск тӑрӑхӗнчи «Каневской комбинат хлебопродуктов – инвест» текен тулли мар яваплӑ обществӑпа — тулӑ туянасси пирки килӗшӳ тунӑ. Пурлӑх комитечӗ шутланӑ тӑрӑх, хапрӑк тырра пасарти вӑтам хакран 25 процент ытларахпа туянма килӗшнӗ. Тата вӑл тырӑ киличченех укҫана куҫарса янӑ имӗш. Кун валли хапрӑк 30 млн кредит та илнӗ. Тавӑҫ тӑратнӑ вӑхӑта нимле тырӑ та килмен. Апла пулсан хапрӑк укҫана айккинелле ӑсатасшӑн.

Ҫав вӑхӑтрах Курскри «УК АНИ Менеджмент» текен общество Шупашкарти кайӑк-кӗшӗк хапрӑкӗ валли (сӑнавҫӑсем сӑмахӗ «Чӑваш бройлерӗ» пиркиех пуль тесе тӗшмӗртеҫҫӗ) пуҫлӑх шырани ҫинчен пӗлтернӗ. Уйӑхри шалӑва 500 пин тенкӗ тесе кӑтартнӑ.

Судӑн ҫитес ларӑвне пуш уйӑхӗн 2-мӗшне куҫарнӑ. Хапрӑкӑн хальхи директорӗ Алексей Подорванов тӑван тӑрӑхне, Украинӑна, тухса кайсан унтан нимӗн те шыраса илеймӗн тесе шухӑшлакансем те пур.

Пирӗн республика вара хапрӑкӑн 49 акцийӗсен 49 процентне тытса тӑнине палӑртмалла. Анчах кӑҫалхи иккӗмӗш кварталта вӑл ӑна сутасшӑн-мӗн.

#Шупашкар районӗ, #Пурлӑх комитечӗ, #ял хуҫалӑхӗ, #Чӑваш бройлерӗ, #экономика, #судсем