Чыслав саманчӗ

Ҫӗмӗрле районӗнче ҫӗртме ҫурла уйӑхӗсенче «Ҫуллахи вӑхӑтӑн ҫӗраҫҫийӗ» ятлӑ ача-пӑча вулавӗн ҫуллахи фестивалӗ иртрӗ. Унта районӑн ял вулавӑшӗсем хутшӑннӑччӗ. Нумай пулмасть, ҫурлан 25-мӗшӗнче, фестивале пӗтӗмлетрӗҫ — Хутарти культура ҫуртӗнче «Ҫу уйӑхӗсен ӑшшийӗ — кӗнекесем» («Это лето было книгами согрето») ятлӑ уяв ирттерчӗҫ. Сӑмах май каласан, уява Ҫӗмӗрлери тӗп вулавӑш ӗҫченӗсен хатӗрлеме тӳр килчӗ.

Фестиваль пирки каласа парас пулсан, ҫу вӑхӑчӗ хушшинче районта вулавӑш ӗҫченӗсем 50 ытла мероприяти ирттерчӗҫ, 8 ҫӗре яхӑн ача хутшӑнчӗ.

Хутарти уяв интереслӗ иртрӗ — хӑнасемпе (фестиваль ҫӗнтерӳҫисем) куракансем умӗнче ачасем сценкӑсем кӑтартрӗҫ, юрласа-ташласа пачӗҫ. Литературӑна пӗлнине те куракансен кӑтартма тиврӗ — пӗчӗк ӑмӑртусем ирттерчӗҫ.

Уяв вӗҫленес умӗн фестиваль ҫӗнтерӳҫисене парнесемпе тата хисеплӗ грамотӑсемпе чысларӗҫ. Ачасен хушшинче парнесене 15-ӗн тивӗҫрӗҫ. Чи хастаррисем: Сергеева Н. (Юманай ял вулавӑшӗ), Арсютова З. (Турхан ял вулавӑшӗ), Кузьмин А. (Тӑванкасси ял вулавӑшӗ) тата ыттисем. Вырӑнта мероприятисене ирттерме хастар хутшӑннӑ вулавӑш ӗҫченӗсене те парнесемсӗр хӑвармарӗҫ — чи хастаррисене чысларӗҫ. I вырӑна Мӑн Улхаш ял вулавӑш ӗҫченӗ Учеева В.П, II вырӑна Турхан ял вулавӑшӗн ӗҫченӗ Осипова Н.Н., III вырӑна Якуртушкӑнь ял вулавӑшӗн ӗҫченӗ Зологина И.Н. тивӗҫрӗ.

#Турхан, #Юманай, #Тӑванкасси, #вулавӑшсем, #Ҫӗмӗрле, #Хутар, #Ҫӗмерле районӗ, #Якуртушкӑнь, #Мӑн Улхаш