Ҫӗнӗ Выҫҫӑлкӑ ялӗ Красноармейски районӗн чиккинче, Ҫӗрпӳ районӗ ҫывӑхӗнерех вырнаҫнӑ. Илемлӗ вырӑн — Ункӑ шывӗ юнашар. Ҫумма-ҫумӑн тенӗ пекех Ҫавалҫырма, Енӗшкасси ялӗсем лараҫҫӗ, Ункӑ урлӑ каҫсан — Ҫӗрпӳ районне кӗрекен Ҫӗньял. Шӑп та лӑп ҫак ял ӗнтӗ шӑматкун, ҫурлан 14-мӗшӗнче, хӑйӗн 120 ҫулне паллӑ турӗ. Уява 200 ҫын ытла пуханчӗ.

Каласа хӑварас пулать, 1990 ҫулта ялӑн 100 ҫулне палӑртнӑччӗ. Вӑхӑт хӑвӑрт шӑвать — унтанпа ялта та улшӑнусем чылай пулса иртрӗҫ. 1997 ҫулта ҫӗнӗ урам хыврӗҫ (урам Степан Кураков ячӗллӗ — вӑл колхозӑн пӗрремӗш председателӗ пулнӑ). Унта халӗ 5 кил. Ҫавӑн пекех 20 ҫул хушшинче яла газ кӗртрӗҫ, асфальтлӑ ҫул ҫитрӗ.

Уява Красноармейски районӗн пуҫлӑхӗ В.В. Александров уҫрӗ. Вӑл кӗскен район пурнаҫӗпе паллаштарчӗ. Ҫӗнӗ Выҫҫӑлкӑ халӑхне ҫӗнӗ урамра шыв башни ҫуккки самай пӑшӑрхантарать иккен, ҫавна май Владимир Валерьянович яла шывпа тивӗҫтерес ыйтӑва 2011 ҫулхи район аталанӑвӗн программине кӗртме шантарчӗ.

Ҫавӑн пекех уяв ячӗпе ял халӑхӗ умӗнче Чатукасси ял тӑрӑхӗн пуҫлӑхӗ Г.В. Михайлов (вӑл хастар ҫынсене Хисеп грамотисемпе тата Тав ҫырӑвӗсемпе чысларӗ), «Трак Ен» ентешлӗхӗн председателӗ А.Н. Львов (малтанхи ял старостине, Чӑваш Республикин тава тивӗҫлӗ культура ӗҫченне Николай Матвеева кавказ хӗҫне парнелерӗ), Ҫӗнӗ Выҫӑлккӑ ял старости Г.Г. Гурьев тата ыттисем сӑмах тухса каларӗҫ.

Ял уявӗ спорт вӑййисемпе, юрӑ-ташӑпа пуян пулчӗ. Халӑх шӳрпе те тутанчӗ, шашлӑкне те ҫисе курчӗ, кӑвас ӗҫрӗ. Халӑха уяв килӗшрӗ — Ҫӗнӗ Выҫҫӑлкӑсем шурӑмпуҫчченех савӑнчӗҫ.

#Чатукасси ял тӑрӑхӗ, #Ҫӗнӗ Выҫҫӑлкӑ, #Красноармейски районӗ, #юбилейсем