Красноармейски районӗнчи шкулсенче Литература ҫулталӑкне халалласа чылай мероприяти ирттернӗ.

«Эпир вун-вун пултарулӑх ҫыннипе тӗлпулусем йӗркелерӗмӗр. Хамӑр ентешпе, пултаруллӑ, пур енлӗ талантлӑ В.В. Рудниковапа иртнӗ тӗлпулу та чылайччен асра юлӗ», — тесе пӗлтерет кун пирки вӑл тӑрӑхри Р. Яковлева.

Валентина Васильевна Ҫӗнӗ Выҫҫӑлккӑ ялӗнче ҫуралнӑ. Енӗшкассинчи пуҫламӑш шкула «4» тата «5» паллӑсемпе вӗренсе пӗтернӗ, Ҫӗрпӳ районӗнчи Виҫикасси шкулӗнче вӑтам пӗлỹ илнӗ. И.Я. Яковлев ячӗллӗ Чӑваш патшалӑх пединститучӗн химипе биологи факультетне вӗренме кӗнӗ. Студент ҫулӗсенче спортпа туслӑ пулнӑ вӑл, тӑтӑшах ӑмӑртусене хутшӑннӑ, япӑх мар кӑтартусемпе палӑрнӑ. Аслӑ шкулта пӗлӳ илнӗ тапхӑртах вӑл тракторпа, автомашинӑпа ҫӳреме хӑнӑхнӑ, киномеханик, медсестра удостоверениллӗ пулнӑ. Алла диплом илнӗ хыҫҫӑн пӗр вӑхӑт Чатукасси шкулӗнче ӗҫлеме тӳр килнӗ ӑна. Унтан пурнӑҫ ҫулӗ Сӗнтӗрвӑрри районне илсе ҫитернӗ. Кайран каллех тӑван тӑрӑха таврӑннӑ. Тивӗҫлӗ канура пулин те, В.В. Рудникован пачах та пушӑ вӑхӑт ҫук тейӗн. Чылайранпа вӑл ЧР культурӑн тава тивӗҫлӗ ӗҫченӗ А. Алексеев ертсе пыракан районти культура ҫурчӗ ҫумӗнчи ветерансен хорне ҫӳрет. Вӗсене уйрӑм кӗнекен те кӑларнӑ. Тӗрлӗ шайри 70 ытла Хисеп грамотипе Диплом ентешӗн. Районти Н. Янкас ячӗллӗ преми лауреачӗ, ЧР музыка обществин тава тивӗҫлӗ ӗҫченӗ, ЧР композиторсен ассоциацийӗн пайташӗ ачасене хӑй сӑввисемпе паллаштарнӑ. Ҫитес ҫулхи пуш уйӑхӗнче В.В. Рудникова черетлӗ юбилейне кӗтсе илме хатӗрленет.

#тӗлпулусем, #культура, #Красноармейски районӗ, #Сӗнтӗрвӑрри районӗ, #вӗренӳ, #Чатукасси, #ачасем, #Виҫикасси, #Енӗшкасси, #Ҫӗнӗ Выҫӑлккӑ