Халӑх театрӗсен республикӑри фестивальне кӑҫал Тӑван ҫӗршывӑн аслӑ вӑрҫинче ҫӗнтернӗренпе 70 ҫул ҫитнине халалланӑ. Хӑй тӗллӗн вӗреннӗ артисстем маларах зонӑри конкурссенче ӑмӑртнӑ. Унта мала тухнисем «Мухтав ахрӑмӗн» республикӑри фестивальне пухӑннӑ. Районсемпе хуласенчи 58 коллектив хутшӑннӑ конкурса.

Фестивале хутшӑнакансене сумлӑ тӳресенчен тӑракан комисси хак панӑ. Председателӗ СССР халӑх артистки Вера Кузьмина пулнӑ. Йыша Чӑваш Республикин халӑх артисчӗсем Анна Кутузова тата Иван Иванов, Чӑваш Республикин тава тивӗҫлӗ артисчӗсем Геннадий Кириллов тата Владимир Григорьев, Ҫеҫпӗл Мишши ячӗллӗ Чӑваш патшалӑх ҫамрӑксен театрӗн артисчӗ Алина Зайцева кӗнӗ.

Тӳресем хӑй тӗллӗн вӗреннӗ сцена ӑстисен ӗҫне 20 номинаципе хакланӑ. «Пуканесен чи лайӑх спектаклӗ» номинацире I степеньлӗ диплома Улатӑрти «Искорка» пукане театрӗ ҫӗнсе илнӗ. Чи лайӑх камите те улатӑрсемех лартнӑ. Алексей Островский пьесипе лартнӑ «Праздничный сон до обеда» спектакльпе палӑрнӑ вӗсем.

Элӗкри культура ҫуртӗнчи халӑх театрне ҫӳрекен Георгий Павлов арҫын сӑнарне чи лайӑх калӑпланипе I степеньлӗ диплома тивӗҫнӗ. Вӑл Г. Терентьев пьеси тӑрӑх лартнӑ «Ют ҫын» спектакльте Игната вылянӑ. Эпизодла сӑнаршӑн та ҫав спектакльти тепӗр артистах мала тухнӑ. Вӑл — Кӗркурине сӑнарланӑ Зиновий Федоров.

I степеньлӗ дипломсем элӗксен татах пур. «Чи лайӑх дуэт» номинацире Тенеяльӗнчи театр коллективне ҫӳрекен Тамара Ивановапа Людмила Васильева Аркадий Ӗҫхӗл пьеси тӑрӑх лартнӑ «Сӑпса йӑви» спектакльти Укахвипе Марфине лайӑх калӑпланӑ. «Нарспи» спектакле лартнӑ Элӗкри культура ҫурчӗн режиссерӗсем Инна Афанасьевапа Николай Ильин «Чи лайӑх режиссер ӗҫӗ» номинацире ҫӗнтернӗ. Ытти номинацисенче те маттуррисене палӑртнӑ.

#Улатӑр, #ҫитӗнӳсем, #театрсем, #культура, #Элӗк, #Тенеяль, #фестивальсем