Паян Пӗтӗм чӑвашсен пӗрремӗш «Асам» кинофестивале пӗтӗмлетрӗҫ. Чи сумлӑ парнене — кинофестивалӗн гран-прине — Марат Никитин режиссёрӑн «Хорло» фильмӗ тивӗҫрӗ.

Ытти номинацисенче ҫаксем палӑрчӗҫ:

• «Чи ӑста илемлӗ фильм» — Евгений Герасимов режиссёрӑн «Егор Шилов» илемлӗ фильмӗ;

• «Чи ӑста документлӑ фильм» — Николай Семенов режиссёрӑн

«Сурхурипе кӑшарни йӑлисем паян...» фильмӗ;

• «Чи ӑста кӗске фильм» — Константин Ефремов режиссёрӑн «Помрачение» фильмӗ (сӑмах май, ӑна пӗрремеш чӑваш хӑруш /хорор/ фильмӗ теме пулать);

• «Чи ӑста ӳкерчӗклӗ фильм» — Владимир Галошевӑн «Чӑваш тӗнчи» мультфильмӗ;

• «Чи ӑста кинооператор» — «Хорло» илемлӗ фильма ӳкернӗ Михаил Блинцов;

• «Чи ӑста монтаж тӑвакан» — «Помрачение» илемлӗ фильма ӑсталама хутшӑннӑ Константин Ефремов;

• «Хӗрарӑм сӑнарне чи ӑста выляканӗ» — «Егор Шилов» илемлӗ фильмра вылянӑ Татьяна Александрова (Тани Юн);

• «Арҫын сӑнарне чи ӑста выляканӗ» — «Егор Шилов» илемлӗ фильмра вылянӑ Валерий Тарасов;

• «Иккӗмӗш планри арҫын сӑнарне ӑста вылякан» — «Егор Шилов» илемлӗ фильмра вылянӑ Сергей Сандлер;

• «Иккӗмӗш планри хӗрарӑм сӑнарне ӑста вылякан» — «Хорло» илемлӗ фильмра вылянӑ Гузаль Мамбетова;

• «Эпизодла хӗрарӑм сӑнарне ӑста вылякан» — «Ҫӗнӗ шӑпӑр ҫӗнӗлле шӑлать» илемлӗ фильмри Галина Иванова;

• «Эпизодла арҫын сӑнарне ӑста вылякан» — «Пурнӑҫ кустӑрми» тата «Хорло» илемлӗ фильмсенче вылянӑ Дмитрий Петров;

• «Чи ӑста сценарист» — «Помрачение» илемлӗ фильмӗн сценарийне ҫырнӑ Евгений Мельников;

• «Чи ӑста композитор» — «Хорло» илемлӗ фильмӑн кӗввине хатӗрленӗ Александр Ян Тараненко;

• «Чи ӑста сасӑ режиссерӗ» — «Помрачение» илемлӗ фильма хатӗрленӗ Юрий Сергеев;

• «Фильма лартакан чи ӑста ӳнерҫӗ» — «Чувашские амазонки» (чӑв. Чӑваш амаҫыннисем) этнографиллӗ документлӑ фильма хатӗрленӗ Анастасия Масляева;

Ҫавӑн пекех жюри темиҫе ятарлӑ номинаци те хатӗрленӗ. «Шанчӑк» ятарлӑ парнене «Ҫӗнӗ шӑпӑр ҫӗнӗлле шӑлать» илемлӗ фильмра тӗп сӑнара вылякан Кирилл Кириллов тивӗҫнӗ. Унсӑр пуҫне «Киремет кати» илемлӗ фильма (режиссерӗ И.С. Максимов-Кошкинский) кӗвӗлесе илемлетнӗшӗн Валерий Игнатьева чысланӑ.

Аса илтеретпӗр, «Асам» кинофестиваль тунтикун, чӳк уйӑхӗн 16-мӗшӗнче, уҫӑлчӗ. Унта пурӗ 11 фильм хутшӑнчӗ: 5 документлӑ фильм, 5 илемлӗ фильм тата пӗр анимациллӗ кино. Вӗсемпе ытларикунтан пуҫласа эрнекун хушшинче паллашма май пулнӑччӗ. Паян, кинофестивале вӗҫленӗ май куракансене «Кӗпер» тата «В краю ста тысяч песен» документаллӑ фильмсене кӑтартрӗҫ. Пӗрремӗшӗн режиссёрӗ Леонид Трифонов, иккӗмӗшӗн — Вениамин Погильдяков.

#культура, #фильмсем, #наци вулавӑшӗ, #кинофестивальсем, #Культура министерстви, #ӳнер, #Асам