ШӖМ тунӑ сӑн

Юпа уйӑхӗн 14-мӗшӗнче 18 сехет те 10 минутра «Атӑл» М-7 автоҫулӑн 706-мӗш ҫухрӑмӗнче, Куславкка районӗнче, велосипедпа пынӑ ҫын машина айне пулнӑ.

Мускавран килекен 28 ҫулти водитель ГАЗ автомашипе велосипедист ҫине пырса кӗнӗ. Лешӗ каҫхи вӑхӑтра хунарсӑр, тӗттӗмре ҫататакан хатӗрсӗр пынӑ, ҫул ҫине ӑнсӑртран сиксе тухнӑ.

Ведосипедпа Куславкка районӗнчи 49 ҫулти арҫын пынӑ. Йывӑр суранланнӑскере пульницӑна илсе ҫитернӗ. Вӑл унта вилнӗ.

auto.ru сӑнӳкерчӗкӗ

Улатӑр арҫынни кӑҫалхи утӑ уйӑхӗнче ют ҫын машинине чӗртсе ҫула тухнӑ. Анчах нумаях та каяйман — лакса ларнӑ.

«УАЗ 31514» автомобиле чӗртсе тухнӑ ӳсӗр арҫын пӗр 10 метр кайсанах хӑйӑр ӑшне путса ларнӑ.

Арҫын тӗлӗшпе РФ Пуҫиле кодексӗн 166-мӗш статйин 1-мӗш пайӗпе пуҫиле ӗҫ пуҫарнӑ. Ют ҫын автомобилӗпе саккуна пӑсса хуҫаланма хӑтланнӑ арҫынна тӗрмене хупмасӑр ҫулталӑклӑха явап тыттарма йышӑннӑ. Судра, сӑмах май каласан, арҫын хӑйӗн айӑпне тунса тӑман, йышӑннӑ.

Вӑрмар районӗнчи Мӑнҫырма ялӗнче лавкка ҫуннӑ. Ҫулӑм 4 тӑваткал метр лаптӑк ҫинче алхаснӑ.

Инкеклӗ лару-тӑру министерстви пӗлтернӗ тӑрӑх, юпа уйӑхӗн 13-мӗшӗнче 15 сехетре пушар тухнӑ. Малтанлӑха пӗлтернӗ тӑрӑх, электрогазосварка ирттернӗ чухне асӑрханманран ҫулӑм тухнӑ. Николаев урамӗнче вырнаҫнӑ лавккара стена ҫуннӑ.

Палӑртмалла: ҫулталӑк пуҫланнӑранпа 1298 пушар тухнӑ. Вӗсенче 66 ҫын вилнӗ, 53 ҫын суранланнӑ, 127 ҫынна ҫӑлнӑ.

"Про Город" сайтри сӑн

Юпа уйӑхӗн 11-мӗшӗнче 19 сехетре Ҫӗмӗрле хулинчи Ҫамрӑксен урамӗнче ҫурт ҫуннӑ. Ҫынсем каланӑ тӑрӑх, пушар верандӑран тухнӑ.

Самантрах урама ҫӑра тӗтӗм карса илнӗ. «Ҫунакан ҫуртра газ баллонӗсем сирпӗнме тытӑнчӗҫ. Унтан электричество сӳнсе ларчӗ. пушарнӑйсенче чӗнчӗҫ. Вӗсем киличчен ҫулӑм верандӑран ҫурт ҫине куҫма ӗлкӗрчӗ», - пушар вырӑнӗнче пулнӑ ҫын.

Пушарнӑйсем мачча ҫине хӑпарас тесе ҫӳлти чӳречене ҫӗмӗрнӗ.

Юпа уйӑхӗн 11-мӗшӗнче 20 сехет ҫурӑра Патӑрьел районӗнче, А-151 федераци ҫулӗн 95-мӗш ҫухрӑмӗнче, авари пулнӑ. Унта скутер кювета чӑмнӑ.

Малтанлӑха пӗлтернӗ тӑрӑх, скутер водителӗ сылтӑм еннелле пӑрӑннӑ чухне руле итлеттереймен те ҫул хӗрринчи тимӗр карта ҫине пырса тӑрӑннӑ.

Скутер рулӗ умӗнче 32 ҫулти арҫын ларнӑ. Суранланнӑскере пульницӑна илсе ҫитернӗ. Палӑртмалла: унӑн права та, ОСАГО та пулман. Ҫитменнине, вӑл шлем та тӑхӑнман.

21.мвд.рф сайтран илнӗ сӑнӳкерчӗксем

Паян Шупашкар хулинчи Фучик урамӗнче, пассажирсене турттаракан транспортра, пӑтӑрмах сиксе тухнӑ. Ҫавӑн пирки йӗрке хуралҫисен дежурнӑй пульчӗ ҫине ирхи 7 сехет те 40 минутра хыпарланӑ. Инкек вырӑнне полицин темиҫе нарячӗ пырса ҫитнӗ.

Маршрутка водительне ҫамрӑк хӗрарӑм ҫӗҫӗпе мӑйӗнчен чикнӗ. 23 ҫулти аманнӑ арҫын-водитель микроавтобуса Сӑкӑт кӗперӗ патӗнчи автозаправка патӗнчи лапама пӑрса илсе чарса лартма пултарнӑ.

Полицейскисен машининче ҫамрӑк хӗрарӑм лӑпкӑ ларнӑ. Пӑтӑрмах сӑлтавне йӗрке хуралҫисем палӑртӗҫ.

ХУШСА КАЛАНИ

РФ Следстви комитечӗн Чӑваш Енри управленийӗнче паян 16 сехет хыҫҫӑн пӗлтернӗ тӑрӑх, ҫӗҫӗпе чикекен ҫамрӑк хӗрарӑм водительпе юнашар ларкӑч ҫинче ларса пынӑ. Вӑл ӳсӗр пулнӑ. Арҫынна вӑл ҫӗҫӗпе чикнӗ. Ҫынна вӗлерме тӑнӑшӑн хӗрарӑм тӗлӗшпе пуҫиле ӗҫ пуҫарнӑ.

Тӗпчевҫӗсем пӗлтернӗ тӑрӑх, водитель хӗрарӑмран хӳтӗленес тӗллевпе машинӑна чарса лартнӑ та ҫӗҫӗллӗ хӗрарӑма хирӗҫ тӑнӑ. Аманнӑ арҫынна пульницӑна ӑсатнӑ.

"Про Город" сайтри сӑн

Шупашкарта нумай хутлӑ ҫурт ҫывӑхӗнче хӗрача виллине тупнӑ. Вӑл ҫӳллӗшӗнчен ӳкнӗ.

Ку пӑтӑрмах паян 14 сехет ҫурӑра Ленин Комсомолӗн урамӗнчи 27-мӗш ҫуртӑн 1-мӗш корпусӗнче пулнӑ. 13-14 ҫулсенчи пек курӑнакан хӗрача 10-мӗш хутри чӳречерен ӳкнӗ.

«Урампа пынӑ чухне тӑрук шаплатнӑ саса илтрӗмӗр», - тенӗ «Про Город» хаҫата халӑх корреспонденчӗсем. РФ Следстви комитечӗн Чӑваш Енри следстви органӗсем халӗ лару-тӑрӑва уҫӑмлатаҫҫӗ.

Инкеклӗ лару-тӑру министерстви тунӑ сӑн

Вырсарникун каҫхи 7 сехет хыҫҫӑн Вӑрмар районӗнчи Шӑплат ялӗнче харӑсах виҫӗ ҫурт ҫунма тытӑннӑ. Инкеклӗ лару-тӑру министерстви пӗлтернӗ тӑрӑх, иккӗшне ҫӑлма май килнӗ. Пушара тӑватӑ автоцистерна сӳнтернӗ.

Шӑматкун вара Шупашкарти Энтузиастен урамӗнчи 7-мӗш ҫуртӑн 1-мӗш корпусӗнче пушар тухнӑ. Каҫхи 6 сехетре иккӗмӗш хутри балкон ҫунма пуҫланӑ. Ҫӑлавҫӑсем ҫитсен ҫулӑма пилӗк минутран сӳнтернӗ.Пушар мӗнрен тухнине халӗ уҫӑмлатаҫҫӗ.

Ӗнер Елчӗк районӗнчи Кивӗ Эйпеҫ ялӗнче виҫӗ тюк улӑм ҫунса кайнӑ. Малтанлӑха пӗлтернӗ тӑрӑх, ӑна ачасем чӗртсе яма пултарнӑ.

ict-online.ru сайтри сӑн

Шупашкарти хӗрарӑм Чулхуларан пирӗн хулана килес тесе 120 пин тенкӗсӗр тӑрса юлнӑ. Йӑлтах ултавҫӑсене пула.

Хӗрарӑм юпан 8-мӗшӗнче полицие пырса инкекӗ пирки каласа кӑтартнӑ. 51 ҫултискер Шупашкара ҫула май килекен транспорт сӗнекен сервиспа усӑ курнӑ. Водительпе ҫыхӑнсан калаҫса татӑлнӑ.

Мессенджерта хӗрарӑм патне укҫа тӳлеме тесе ссылка килнӗ. Ку банк карттин реквизичӗсене ҫырнӑ та счечӗ ҫинечн 120 пин тенкӗ ҫухалнӑ.

Кун тӗлӗшпе уголовлӑ ӗҫ пуҫарнӑ.

"Про Город" сайтри сӑн

Ҫӗрпӳ хулинче пӗр ҫуртӑн балкон айӗнче пушар пулнӑ. Ҫулӑма пушарнӑйсем, ҫынсем сӳнтернӗ.

Ку паян, юпа уйӑхӗн 9-мӗшӗнче, 15 сехетре Никитин урамӗнчи 3-мӗш ҫуртра пулнӑ. Иртен-ҫӳрен пӗрремӗш хутри балкон айӗнче ҫулӑм тухнине асӑрханӑ. Ҫынсем каланӑ тӑрӑх, унта ҫамрӑксем ларма юратаҫҫӗ, унтах пирус туртаҫҫӗ.

Юрать-ха, ҫулӑма хӑвӑртах сӳнтернӗ. Иртен-ҫӳрен те пушарнӑйсене пулӑшнӑ.