forum.zarulem.ws сӑнӳкерчӗкӗ

Авӑн уйӑхӗн 1-мӗшӗнче Йӗпреҫ поселокӗнче инкек пулса иртнӗ. Ҫав кун 17 сехет тӗлӗнче пӗр арҫын КамАЗ автомобиль ҫумӗнче тӑнӑ. Ӑна «УАЗ-Патриот» автомобиль ҫапса кайнӑ. Аманнӑ арҫынна пульницӑна ӑсатнӑ.

Чӑваш Енӗн Шалти ӗҫсе министерствинче пӗлтернӗ тӑрӑх, «УАЗ» автомобиле районти шалти ӗҫсен пайӗн полицин участокри уполномоченнӑйӗ тытса пынӑ. Тӗрӗсленӗ хыҫҫӑн пакунлӑ ҫын ӳсӗр пулни палӑрнӑ.

Инкек вырӑнне республикӑн шалти ӗҫсен министрӗ, полицин генерал-майорӗ Виктор Шметков пырса ҫитнӗ.

Инкек хыҫҫӑн служба тӗрӗслевӗ пуҫарнӑ. Участковӑя ӗҫрен кӑларса яма, унӑн пуҫлӑхӗсене дисциплина енчен ҫирӗп явап тыттарма йышӑннӑ.

РФ Следстви комитечӗн Чӑваш Енри тӗпчевҫисем вара пуҫиле ӗҫ пуҫарнӑ.

«ЛизАлерт» шырав отрячӗ Шупашкарти шкул ачине шыранине Чӑваш халӑх сайчӗ темиҫе кун каялла пӗлтернӗччӗ-ха. 17-ри яша халӗ Чӑваш Енри йӗрке хуралҫисем те шыраҫҫӗ.

Тимур Мохаммад Азадович Миа пирки Чӑваш Енӗн ШӖМӗнче ҫапларах пӗлтернӗ: яш ҫурла уйӑхӗн 24-мӗшӗнче 19 сехет тӗлӗнче велосипедпа ярӑнма тухса кайнӑ та килне таврӑнман. Шупашкар кӳлмекне тухса кайнӑ. Яша шырас ӗҫе РФ Следстви комитечӗн Чӑваш Енри тӗпчевҫисем те хутшӑннӑ. Ҫак хыпарсене асӑннӑ икӗ ведомствӑн сайчӗсене паян хыпарланӑ. Каччӑ Шупашкар кӳлмекне каяссине пӗлтернӗ-мӗн.

Аса илтерер: сӑнпа пӑхсан яш 17-18 ҫулсенче курӑнать, ҫӳллӗшӗ 183 сантиметр, яштака кӗлеткеллӗ, тӗксӗмрех сӑн-питлӗ, хура ҫӳҫне кӗске кастарнӑ, куҫӗ хӑмӑр, куҫлӑхпа ҫӳрет.

Килтен тухса кайнӑ чухне яш ҫутӑ-сӑрӑ тӗслӗ толстовкӑпа, хаки тӗслӗ шӑлаварпа, хура кроссовкипе, шурӑ нускипе пулнӑ, ҫурӑмӗ хыҫне хура рюкзак ҫакнӑ.

Шупашкар хулинче пӗр арҫын кану базине иленнӗ. Анчах унта канма кайман вӑл, вӑрлама. Ҫын укҫи-тенкине тата ют пурлӑха пурӗ 300 пин ытла тенкӗлӗх вӑрланӑ арҫынна халӗ тытса чарнӑ.

Арҫын Шупашкарти Университет урамӗнчи кану базинче канакансене темиҫе хутчен те шар кӑтартнӑ. Вӑрӑ ӗҫӗпе ҫуллахи вӑхӑтра аппаланнӑ.

Чӑваш Енӗн Шалти ӗҫсен министерствинче пӗлтернӗ тӑрӑх, арҫын уҫӑ чӳречесемпе балконсем витӗр кӗнӗ. Улӑхиччен номере сӑнанӑ, никам та ҫуккине ӑнланса илсен кӗнӗ. Хайхискер видеосӑнав камерисен тӗлне ҫакланнӑ.

Вӑрӑ ӗҫӗпе аппаланнӑ этем — 41 ҫулти арҫын. Унччен те судпа айӑпланнӑскер. Вӑрланине вӑл тунман. Ӑна кану базине 7 хутчен кӗнӗ тесе шухӑшлаҫҫӗ.

ҪҪХПИ тунӑ сӑн

Ҫурла уйӑхӗн 27-мӗшӗнче Канаш районӗнче мотоциклист аварире вилнӗ. Кун пирки ҪҪХПИ Инстаграмри страницинче пӗлтернӗ.

Авари Крамами выҫҫӑлкки ҫывӑхӗнче, Энӗш ҫул ҫинче, пулнӑ. Ведомство пӗлтернӗ тӑрӑх, мотоциклпа пыракан ҫын тепӗр транспортран иртсе кайнӑ чухне тепӗр машинӑна ҫул паман. Лешӗ ун ҫине пырса кӗнӗ.

Шел те, мотоциклист ҫав вырӑнтах вилнӗ. Халӗ авари мӗнле майпа пулнине тӗпчеҫҫӗ.

"Про Город" сайтран илнӗ сӑн

Шупашкарти Дементьев урамӗнчи 22-мӗш ҫуртра пурӑнакансем ҫурла уйӑхӗн 29-мӗшӗнче каҫхине 23 сехетре сасӑпа вӑранса кайнӑ. Тепӗртакран мӗн пулса иртни паллӑ пулнӑ: подъезд карнизӗ ҫине ҫын персе аннӑ.

Ҫав ҫын 40-45 ҫулсенчи пек курӑнакан хӗрарӑм пулнӑ. Вырӑна васкавлӑ медпулӑшу, следовательсем 10 минутран ҫитнӗ. Хӗрарӑм карниз ҫине ӳксенех вилнӗ. Ҫур ҫӗр иртни 2 сехетре унӑн виллине илсе кайнӑ.

Малтанлӑха пӗлтернӗ тӑрах, хӗрарӑм 9-мӗш хутран ӳкнӗ. Халӗ ӗҫ-пуҫа малалла тӗпчеҫҫӗ, вӑл мӗнле майпа ӳкнине уҫӑмлатаҫҫӗ.

nat-geo.ru сайтри сӑн

Шупашкар районӗнчи Кӳкеҫ поселокӗнче арҫын виллине тупнӑ. РФ Следстви комитечӗн Чӑваш Енри следстви органӗсем кун тӗлӗшпе следстви умӗнхи тӗрӗслев ирттереҫҫӗ.

Арҫын виллине ӗнер, ҫурла уйӑхӗн 28-мӗшӗнче, Кӳкеҫ поселокӗ ҫывӑхӗнчи ҫырмара асӑрханӑ. Ӗнер следовательсем ҫав ҫын кам пулнине, вӑл мӗнле вилнине палӑртас тӗллевпе ӗҫленӗ.

Хӗрарӑмсем те руль умне ӳсӗрле ларма юратаҫҫӗ.

«Советская Чувашя» хаҫа Инстаграмра ӗнер пӗлтернӗ тӑрӑх, ҫурла уйӑхӗн 6-мӗшӗнче, сӑмахран, Патӑрьел районӗнчи Турхан ялӗнче 27 ҫулти хӗрарӑм хамӑр ҫӗршывра кӑларнӑ машинӑпа ҫул айккине чӑмнӑ. Аллине хуҫнӑскере пульницӑна илсе кайнӑ. Лере тухтӑрсем тӗрсленӗ те организмра 0,705 мг эрех пулни палӑрнӑ. Арҫыншӑн та ун чухлӗ эрех ӗҫни нумай теҫҫӗ специалистсем.

«Кӳкеҫ — Тутаркасси — Ҫӗнӗ Шупашкар» ҫул ҫинче 29 ҫулти хӗрарӑм инкеке лекнӗ. Шупашкар районӗнче пурӑнаканскер «Фольксваген Поло» машина рульне тытса пынӑ. Машина ҫул айккине чӑмсан вӑл аманнӑ. Анчах хытах мар. Вӑл та ӳсӗр пулнӑ.

jooinn.com сайтри сӑн

Ҫурла уйӑхӗн 24-мӗшӗнче Атӑл юханшывӗнчен, Чермыхыр утрав ҫинчен, ҫӑлавҫӑсем патне шӑнкӑрав ҫитнӗ. Арҫын урине амантнӑ та унтан тухаймасть-мӗн. Ҫапла пӗлтернӗ Республикӑри шыравпа ҫӑлав служби.

2-мӗш ҫӑлав посчӗн дежурнӑй ушкӑнӗ утрав ҫине пӗр тӑхтамасӑр тухса кайнӑ та суранланнӑ, хӑй тӗллӗн утайман арҫынна пулӑшнӑ. Вӗсем ӑна васкавлӑ медпулӑшу тухтӑрӗсене панӑ, лешсем пульницӑна ӑсатнӑ.

Элӗк районӗнчи Шоркасси Сорӑм ялӗнче пурӑнакан 58 ҫулти арҫынна ҫынна заложника ярса илнӗшӗн айӑплӗҫ. Унсӑр пуҫне вӗлерессипе 3 хутчен хӑратнӑ, ӗҫри влаҫ представительне хӑратнӑ.

Пӑтӑрмах пӗлтӗрхи ҫурла уйӑхӗн 14-мӗшӗнче, авӑн уйӑхн 5-мӗшӗнче тата юпа уйӑхӗн 7-мӗшӗнче пулса иртнӗ. Ҫавӑн чухне арҫын хӑйӗн килӗнче пулнӑ-ха. Ӳсӗрскер пӗрле пурӑнакан 54 ҫулти хӗрарӑмпа харкашма тытӑннӑ. Алӑ та ҫӗкленӗ, вӗлерессиие хӑратнӑ. Юлашки тӗслӗхре пӑтӑрмах пирки пӗлсен пӗр ял хӗрарӑмӗ йӗрке хуралҫисене евитленӗ.

Пакунлисем вырӑна килсе ҫитсен арҫын алӑка уҫман, полицейскисене кайма хушнӑ. 16-мӗш калибрлӑ «ИЖ-18Е» пӑшалтан алӑк витӗр перессипе, хӗрарӑма вӗлерессипе хӑратнӑ.

Унтан вырӑна Росгвардин спецназӗ тата полицейскисем персе ҫитнӗ. Арҫын пӗрле пурӑнакан хӗрарӑм мӑйӗ патне ҫӗҫӗ илсе пынӑ, полицейскисене ҫаврӑнса кайма ыйтнӑ, ахальлӗн хӗрарӑма вӗлерессипе хӑратнӑ. Унтан вӑл кил ҫывӑхӗнчи вӑрмана тухса тарнӑ. Анчах пакунлисем тытса чарнӑ.

"Про Город" сайтран илнӗ сӑн

Паян ҫур ҫӗр иртсен Комсомольски районӗнчи Анат Тимӗрчкасси ялӗнче пушар алхаснӑ. Ҫулӑм икӗ пӳрте тӗп тунӑ.

Инкеклӗ лару-тӑру министерстви пӗлтернӗ тӑрӑх, пушар тухнине ҫур ҫӗр иртни 3 сехет тӗлӗнче курнӑ. Ҫунса кайнӑ пӗр ҫуртӗнче пурӑннӑ хӗрарӑм пушартан ҫӑлӑнас тесе иккӗмӗш хутран сикнӗ. Ҫапла вӑл аллине амантнӑ, ӑна тухтӑрсем пулӑшнӑ.

Паян ирхине Муркаш районӗнчи «Хӗвеллӗ» сад юлташлӑхӗнче те пушар пулнӑ. Унта хуралтӑ таврашӗсем кӗле ҫаврӑннӑ.