Ҫӗмӗрле хулинче 7 ҫулти хӗрача пӗрене айне пулса вилнӗ.

Инкек авӑн уйӑхӗн 23-мӗшӗнче пулса иртнӗ.

РФ Следстви комитечӗн республикӑри управленийӗн пресс-службинче пӗлтернӗ тӑрӑх, ача хӑйсен килӗнчен инҫех мар ҫӗрте выртакан пӗренесем ҫине хӑпарса кайнӑ. Вӑйӑран вӑкӑр тухать теҫҫӗ те, ҫавӑн пекрех пулса иртнӗ те. Пӗренесем куҫса кайнӑ та, хӗрача аяла пулса вилмеллех аманнӑ.

Пӑтӑрмах хыҫҫӑн тӗпчевҫӗсем тӗрӗслев пуҫарнӑ. Вӗсен инкек мӗншӗн пулса иртнине палӑртма тивӗ. РФ Пуҫиле кодексӗн 109-мӗш статйин 1-мӗш пайӗпе пуҫиле ӗҫ пуҫарнӑ та ӗнтӗ.

fitnessclubs.ru сӑнӳкерчӗкӗ

Шупашкарта пурӑнакан пӗр хӗре пула фитнес-студире пушар тухнӑ. 22 ҫулти пике ятарласа сиен кӳмен-ха. Пӑтӑрмах ӑнсӑртран сиксе тухнӑ. Ҫунакан ҫуртана вӑл администратор стойки ҫинче хӑварнӑ.

Фитнес-студире хӗр 2019 ҫулхи раштав уйӑхӗнче ӗҫленӗ. Ҫутнӑ ҫуртапа вӑл зал тӑрӑх утнӑ, сӳнтерменскере пластик стакана ярса администратор стойки ҫине лартса хӑварнӑ. Вут-ҫулӑм пурлӑхӑн пӗр пайне тӗп тунӑ, теприне сиенленӗ.

Хӗре суд РФ Пуҫиле кодексӗн 168-мӗш статйипе айӑпланӑ. Пике айӑпа кӑштах йышӑннӑ май маларах тӑкака 250 пин тенкӗлӗх саплаштарнӑ-ха. Анчах суд тата фитнес-студи хуҫи унпах ҫырлахман. Пикене суд 6 пин тенкӗлӗх штрафланӑ, тӑкака туллин саплаштармалӑх тепӗр 350 пин тенкӗ тӳлеттерме йышӑннӑ.

Авӑн уйӑхӗн 23-мӗшӗнче Куславкка районӗнче, М-7 ҫул ҫинче, трактор ҫаврӑнса ӳкнӗ. Прицепӗ ҫинче ҫӗрулми пулнӑ.

Трактор фурӑпа ҫапӑнсан тӳнсе кайнӑ. Юрать-ха, тракторисчӗ чӗрех.

Аса илтерер: нумаях пулмасть республикӑра трактор ҫаврӑнса ӳкни пирки пӗлтернӗччӗ. Вӑл ҫын ӑсталанӑ транспорт пулнӑ. Шел те, 30 ҫулти тракторист транспорт айне пулса вилнӗ.

Инкеклӗ лару-тӑру министерстви тунӑ сӑн

Ӗнер, авӑн уйӑхӗн 23-мӗшӗнче, 21 сехетре Ҫӗмӗрле районӗнчи Саланчӑк ялӗнче пушар пулнӑ. Юрать-ха, унта никам та вилмен. Ҫурт, хуралтӑ таврашӗ ҫунса кайнӑ. Кил хуҫисем сывах. Халӗ пушар мӗнрен тухнине уҫӑмлатаҫҫӗ.

Чантӑр ялӗнче те, «Тихая слобода» коттедж поселокӗнче, пушар алхаснӑ. Май урамӗнче мунча ҫуннӑ. Ҫулӑм ҫывӑхра ларакан ҫурт ҫине те куҫма пултарнӑ. Пӳрте ҫулӑмран сыхласа хӑварма пултарнӑ.

Ҫулталӑк пуҫланнӑранпа 1220 пушар пулнӑ. Вӗсенче 64 ҫын вилнӗ, 52 ҫын суранланнӑ. Пушарсенчен 127 ҫынна ҫӑлнӑ.

"Про Город" хаҫатран илнӗ сӑн

Паян, авӑн уйӑхӗн 23-мӗшӗнче, кӑнтӑрла тӗлне Шупашкарта Иван Яковлев проспектӗнчи 8-мӗш ҫурт ҫывӑхӗнче хӗрарӑм виллине тупнӑ. Кун пирки «Про Город» хаҫата халӑх корреспонденчӗсем пӗлтернӗ.

Вырӑна следовательсем, полицейскисем, тухтӑрсем килнӗ. Судмедэкспертсем те пынӑ. Ҫынсем курнӑ тӑрӑх, ватӑ хӗрарӑм уҫӑлма тухнӑ та ӑна япӑх пулса кайнӑ. Вӑл 80 ҫулсенчи пек курӑнать.

РФ Следстви комитечӗн Чӑваш Енри следстви органӗсем кун тӗлӗшпе тӗрӗслев ирттереҫҫӗ.

ҪҪХПИ тунӑ сӑн

Шупашкарта пулнӑ аварире ҫынсем вилнӗ. Кун пирки ҪҪХПИ пӗлтерет. Авари ӗнер, авӑн уйӑхӗн 21-мӗшӗнче, пулнӑ.

Орлов тата Вишнев урамӗсем хӗресленнӗ вырӑнта «Хендай Солярис» тата «Лада Гранта» ҫапӑннӑ. ҪҪХПИ пӗлтернӗ тӑрӑх, «Лада Гранта» аслӑ ҫул ҫине тухнӑ чухне «Хендай Соляриса» ирттерсе яман.

«Лада Грантӑри» ҫынсене машинӑра хӗстерсе лартнӑ. 80 ҫулти водитель ҫавӑнтах вилнӗ. 81 ҫулти пассажиркӑна пульницӑна илсе кайнӑ. «Хендай Солярис» машинӑри виҫӗ пассажира (иккӗшӗ – ача) пульницӑна илсе ҫитернӗ.

Египетран Чӑваш Ене вӗренме килнӗ студент тӗнче тетелӗнче лавкка уҫса наркотик сутнӑ. Ӑна пулӑшакансем те пулнӑ. ЧР прокуратури виҫӗ ҫын тӗлӗшпе айӑплав алӑ пуснӑ.

Следстви версийӗ тӑрӑх, студент лавккана пӗлтӗр уҫнӑ. Ҫак ӗҫе вӑл Египетран килнӗ тепӗр ҫынна тата пирӗн республикӑри хӗре явӑҫтарнӑ. Вӗсем вӑл каланипе наркотике вӑрттӑн вырӑнсем урлӑ сутнӑ.

Ҫак ӗҫе йӗрке хуралҫисем чарса лартнӑ. Вӗсем пурӑнакан вырӑна ухтарсан 300 грамм наркотик тупнӑ. Вӗсен тӗлӗшпе пуҫарнӑ уголовлӑ ӗҫе кӗҫех Шупашкарти Мускав районӗн сучӗ пӑхса тухӗ.

Инкеклӗ лару-тӑру министерстви тунӑ сӑн

Паян ҫӗрле Сӗнтӗрвӑрри хулинче пушар пулнӑ. Степан Разин урамӗнчи ҫурт тӗппипех ҫунса кӗлленнӗ.

Кунран та хӑрушраххи – унта ҫын вилнӗ. Ҫуртра ватӑ ҫынсем, арӑмӗпе упӑшки, пурӑннӑ. 73 ҫулти хӗрарӑма ҫӑлма май килнӗ. Ӑна пушар вырӑнне ҫитнӗ ҫын урама илсе тухнӑ. Упӑшкине вара, 1948 ҫулта ҫуралнӑ арҫынна, ҫӑлма май килмен. Вӑл пушарта ҫунса вилнӗ.

Сӑмах май, ҫулталӑк пуҫланнӑранпа республикӑра 1210 пушар пулнӑ. Вӗсенче 64 ҫыннӑн пурнӑҫӗ татӑлнӑ, 52-ӗн суранланнӑ, 127 ҫынна ҫӑлнӑ.

"Про Город" сайтри сӑн

Паян, авӑн уйӑхӗн 18-мӗшӗнче, 11 сехет тӗлӗнче Шупашкар районӗнчи Ҫӑкалӑх ялӗ ҫывӑхӗнче авари пулнӑ, унта ҫын вилнӗ.

«Про Город» хаҫата халӑх корреспонденчӗ пӗлтернӗ тӑрӑх, трактор ҫулпа пынӑ, ӑнсӑртран унталла-кунталла пӑркаланма тытӑннӑ. Транспорт ҫаврӑнса ӳкнӗ те водитель аяла пулнӑ. 30-35 ҫулсенчи пек курӑнакан арҫын ҫавӑнтах вилнӗ.

Палӑртмалла: трактор савутра каларнӑскер мар, ҫын пуҫтарнӑскер пулнӑ.

Ҫӗмӗрле хулинче пурӑнакан арҫын директора ҫӗҫӗпе чикнӗ. Хӑйӗн пуҫлӑхне мар-ха. Управляющи компани ертӳҫине.

Кӑҫалхи утӑ уйӑхӗн 15-мӗшӗнче нумай хваттерлӗ ҫуртсенчен пӗринче пурӑнакан харпӑрлӑхҫӑсем пухӑва пуҫтарӑннӑ. Унта ҫурта тытса тӑракан управляющи компани директорӗ те хутшӑннӑ. Пухурисенчен пӗри, ҫуртра пурӑнакан арҫын, пӗрмай тем кӑшкӑрса тӑнӑ. Директор ӳсӗр ҫын сӑмахне хӑлхана чикес темен, илтмӗш тунӑ. Арҫынна ҫавӑ тарӑхтарсах янӑ. Вӑл хӑйӗн хваттерне кӗрсе унтан ҫӗҫӗ йӑтса тухнӑ. Ҫавӑнпа директора кӑкӑр тӗлӗнчен чикнӗ.

Тӗпчевҫӗсем тата тухтӑрсем ӳсӗр ҫын директор сывлӑхне ҫӑмӑл сиен кӳнине палӑртнӑ. Апла пулин те пӑтӑрмахшӑн Ҫӗмӗрле арҫыннин явап тытма тивех. Пуҫиле ӗҫе суда ярса панӑ ӗнтӗ.