m.ru24.net сӑнӳкерчӗкӗ

Шупашкар районӗнче полицин 47 ҫулти экс-ӗҫченне суд тунӑ. Ӑна улталанӑшӑн тата улталама хӑтланнӑшӑн айӑпланӑ.

2021 ҫулти утӑ уйӑхӗн 21-мӗшӗнче вӑл вӑйӑ усламӗпе саккуна пӑсса аппаланакан ҫынпа (ун тӗлӗшпе халӗ пуҫиле ӗҫ пуҫарнӑ) паллашнӑ. Унччен право хуралӗн тытӑмӗнче ӗҫленӗ май паллакансем нумай, йӗрке хуралҫине укҫа тыттарсан саккуна пӑсса укҫа тӑвакан усламҫа хӳтте илме май пур тесе шантарнӑ.

Усламҫӑ «ырӑ сӗнӳпе» килӗшнӗ. 2021 ҫлхи утӑ уйӑхӗнчен тытӑнса 2022 ҫлхи пуш уйӑхӗччен вӑл 3 миллион тенкӗ панӑ. Ҫав укҫа кирлӗ ҫынсен аллине кӗрӗ тесе шаннӑ. Экс-полицейски укҫана никама та паман, шантарнине пурнӑҫлама унӑн май пулман.

Кӑшт вӑхӑт иртсен экс-полицейски хӑйӗн ҫӗнӗ тусӗ тӗлӗшпе пуҫиле ӗҫ пуҫарнине илтет. Кӑҫалхи ака уйӑхӗнче вӑл усламҫӑран 10 миллион тенкӗ ыйтать. Ҫав укҫапа пуҫиле ӗҫе чарса лартма май пур тесе ӗнентерет. Усламҫӑ «кӗмӗл» тыттарнӑ чухне экс-полицейские Федерацин хӑрушсӑрлӑх службин ӗҫченӗсем тытса чараҫҫӗ.

Экс-полицейские суд 4 ҫул та 6 уйӑхлӑха пӗтмӗшле режимлӑ колоние ӑсатма, 600 пин тенкӗ штраф тӳллеттерме йышӑннӑ. Суд приговорӗ саккунлӑ вӑя кӗреймен-ха.

Малалла...

epp.genproc.gov.ru сӑнӳкерчӗкӗ

Шупашкар хулинче пурӑнакан 33 ҫулти хӗрарӑм пӗрле пурӑннӑ арҫынна вӗлернӗ.

Харкашу ака уйӑхӗн 5-мӗшӗнче ирхи 9 сехетре пулса иртнӗ. Ҫемье Грасис урамӗнче пурӑннӑ. Ҫав кунхине ҫамрӑк хӗрарӑм ӳсӗр пулнӑ. Пӗрле пурӑнакан 38 ҫулти арҫын киле час таврӑнман. Ҫавӑншӑн тулашнӑ хӗрарӑм арҫынпа харкашма тытӑннӑ. Тарӑхнӑскер аллине ҫӗҫӗ ярса илнӗ, унпа арҫынна кӑкӑр тӗлӗнчен пӗр хутчен чикнӗ.

Ҫӗҫӗпе чикнӗ хыҫҫӑн хӗрарӑм арҫынна пӗрремӗш пулӑшу кӳме хӑтланнӑ, хӑйех тухтӑрсене чӗнсе илнӗ. Суд ҫавна шута илнӗ — хӗрарӑма 7 ҫуллӑха пӗтӗмӗшле режимлӑ колоние ӑсатнӑ.

forum.na-svyazi.ru сайтран илнӗ сӑнӳкерчӗк

Шупашкарта тата Ҫӗнӗ Шупашкарта общество транспорчӗн маршручӗсене улӑштарасшӑн.

Республикӑн тӗп хулинче транспорт реформи 2018 ҫулта пулса иртнӗччӗ.

Ҫӗнӗ реформа хулари 9 автобус маршрутне тата 1 троллейбус маршрутне пӑрахӑҫлама палӑртать. 14 автобус маршрутне тата 5 троллейбус маршрутне улӑштарма шухӑшлаҫҫӗ. Ҫӗнӗ 3 автобус маршручӗ тата троллейбус маршручӗ кӗртесшӗн. 2 автобус маршручӗпе 10 троллейбус маршручӗ унчченхиллех юлӗ.

Ҫӗнӗ Шупашкарта 6 автобус маршрутне пӑрахӑҫласшӑн, 2 автобус маршрутне тата 3 троллейбус маршрутне улӑштарасшӑн.

Шупашкарпа Ҫӗнӗ Шупашкар хушшинчи 101, 101с, 220, 234, 262, 270, 331-мӗш маршрутсене пӑрахӑҫласа троллейбуссем ҫӳретме тытӑнасшӑн.

gap.archives21.ru сӑнӳкерчӗкӗ

Кун хыҫҫӑн кун сисмесӗр иртет те пурнӑҫи хӑш-пӗр саманта асӑрхамасӑр та ирттерсе яратпӑр пулӗ. Хӑшӗсем пирки кая юлса пулин те чарӑнса тӑрасах килет.

Ҫурла уйӑхӗн 1-мӗшӗнче Иван Васильев (01.08.1882-16.02.1974) юрӑҫ, педагог, Чӑваш АССРӗн тава тивӗҫлӗ учителӗ ҫуралнӑранпа 140 ҫул ҫитрӗ.

Иван Васильевич — чӑвашсен профессилле пӗрремӗш юрӑҫӗ. Хальхи Тутар Республикинчи Чӑваш Чураппан ялӗнче ҫуралнӑ. Чӗмпӗрти чӑваш шкулӗнче, Хусанти учительсен семинарийӗнче, Пермьри музыкӑпа педагогика институтӗнче вӗреннӗ.

Вӑл баритон сасӑпа юрланӑ. Чӑваш патшалӑх театрӗн управляющийӗ, Радиокомитетра юрӑҫ пулсак ӗҫленӗ, Ашхабадри тата Шупашкарти музыка училищисенче вӗрентнӗ. 1957-1974 ҫулсенче Питӗр хулинче пурӑннӑ.

ШӖМ тунӑ сӑн

Ҫӗртме уйӑхӗн 2-мӗшӗнче Шупашкарта пурӑнакан 25 ҫулти арҫын полицие пырса 390 пин тенкӗ ҫухални пирки пӗлтернӗ. Ӗҫ-пуҫ акӑ мӗнле пулса иртнӗ.

Вӑл каҫхине ҫӳп-ҫап тӑкма тухнӑ. Каялла таврӑннӑ та - хваттер алӑкӗ хӑйех питӗрӗнсе ларнӑ. Хӑйӗнпе пӗрле вара уҫҫи пулман. Кӳршисене сасӑпа вӑратас мар тесе вӑл тусӗ патне ҫӗр каҫма кайнӑ.

Ирхине таврӑнсан хваттере кӗрейнӗ. Анчах сӗтел ҫинчи 390 пин тенкӗ пулман. Полици укҫана 49 ҫулти кӳршӗ хӗрарӑмӗ вӑрланине палӑртнӑ. Хайхискер алӑк уҫӑ пулнине курсан шала кӗнӗ, сӗтел ҫинчи укҫана илнӗ те тухса кайнӑ.

Хӗрарӑм тӗлӗшпе пуҫиле ӗҫ пуҫарнӑ.

Елена Бадаева. cap.ru сӑнӳкерчӗкӗ.

Шупашкар хулин ҫуралнӑ кунӗ умӗн хулан хисеплӗ ҫыннине палӑртасси йӑлана кӗнине Чӑваш халӑх сайчӗ пӗлтернӗччӗ. Аса илтерер: кӑҫал ку ята тивӗҫессишӗн 3 ҫын: Шупашкарти 1-мӗш ҫӑкӑр завочӗн тӗп директорӗ Елена Бадаева, Чӑваш халӑх писателӗ Анатолий Кипеч, «Отделфинстрой» строительство организацийӗн тӗп директорӗ Александр Черкунов — кӗрешнӗ. Сасӑлава «Уҫӑ хула» порталта йӗркеленӗ.

Сасӑлава 7 594 ҫын хутшӑннӑ, вӗсенчен 5 297-шӗ Елена Бадаевашан. Анатолий Кипеч иккӗмӗш вырӑн йышӑннӑ, Александр Черкунов — виҫҫӗмӗш.

Чӑваш Енре «Нарспи» балет лартма палӑртаҫҫӗ. Ун валли Анисим Асламас композитор темиҫе ҫул каялла ҫырнӑ кӗвӗпе усӑ курӗҫ. Вӑл хайлав Наци вулавӑшӗн архивӗнче упраннӑ.

Чӑваш Енӗн культура министрӗ Светлана Каликова пӗлтернӗ тӑрӑх, 2023 ҫул валли хатӗрленӗ проектсенчен «Нарспи» балет ытларах кӑсӑклантарнӑ.

Аса илтерер: грантсене килес ҫул Чӑваш патшалӑх юрӑпа ташӑ ансамблӗ (5 млн тенкӗ), К.В. Иванов ячӗллӗ Чӑваш патшалӑх академи драма театрӗ тата Вырӑс драма театрӗ (3 млн), СССР лётчик-космонавчӗ А.Г. Николаевӑн мемориал комплексӗ тата Ҫеҫпӗл Мишши ячӗллӗ Чӑваш патшалӑх ҫамрӑксен театрӗ (1 млн) тивӗҫнӗ.

gov.cap.ru сӑнӳкерчӗкӗ

Шупашкарта пурӑнакансем Республикӑн шыравпа ҫӑлав службинчен сӑпсасемпе вӗлле хурчӗсенчен хӑраса кӑҫал пӗрре кӑна мар шӑнкӑравланӑ. Нумаях пулмасть хулари Гастелло урамӗнчи тата Эгер бульварӗнчи ҫуртсене асӑннӑ хурт-хӑмӑр иленнӗ. Вӗсем хваттерсен чӳречи патне йӑва ҫавӑрнӑ.

Ҫӑлавҫӑсем вырӑна ҫитсе йӑвасене пуҫтарса кайнӑ та вӑрмана илсе кайса янӑ.

Сӑпсасемпе вӗлле хурчӗсем ӑшӑ вырӑнсене юратаҫҫӗ, ҫавӑнпа вӗсем ҫурт-йӗр патӗнче йӑва ҫавӑраҫҫӗ тесе пӗлтереҫҫӗ специалистсем.

Инкеклӗ лару-тӑру министерстви тунӑ сӑн

Ҫурла уйӑхӗн 1-мӗшӗнче ҫӗрле, ҫур ҫӗр иртни 2 сехетре, Ҫӗрпӳ районӗнчи Хурӑнвар ялӗнче пушар пулнӑ. Унта лавкка ҫунса кайнӑ. Кун пирки Инкеклӗ лару-тӑру министерстви пӗлтерет.

Ҫулӑм 24 тӑваткал метр лаптӑка тӗп тунӑ. Ку кӑна мар – вӑл кӳршӗллӗ ҫурт ҫине те куҫнӑ. Ҫулӑм ҫенӗке сиенлетнӗ. Юрать-ха, пушарнӑйсем «хӗрлӗ автана» сарӑлма паман. Пӳрте, хуралтӑсене сыхласа хӑварма пултарнӑ. Ҫӑлавҫӑсем пушарнӑйсемпе пӗр сехете яхӑн кӗрешнӗ.

Халӗ «хӗрлӗ автан» мӗн чухлӗ тӑкак кӳнине шутлаҫҫӗ.

chuvashia.sledcom.ru сӑнӳкерчӗкӗ

Муркаш районӗнче ӳсӗр ҫамрӑк арҫын икӗ йӗрке хуралҫисене хирӗҫ тӑнине Чӑваш халӑх сайчӗ пӗлтернӗччӗ.

Аса илтерер: утӑ уйӑхӗн 29-мӗшӗнче Муркаш районӗнчи Токшик ялӗ тӗлӗнче 29 ҫулти водитель водитель тытса пыракан машинӑна чарнӑ. Ҫавӑн чухне ҫав этем ҫул-йӗр хӑрушсӑрлӑхӗн патшалӑх службин инспекторне тата патрульпе пост службин инспекторне бензинпа сапнӑ, унтан зажигалка ҫутнӑ. Пакунлисенчен пӗрин ӳчӗ 50 процент ытла пиҫсе кайнӑ. Усал шухӑшлӑ водитель вырӑнтан тапса сикнӗ.

Халӗ ҫав ҫамрӑка тӑван тӑрӑхӗнче — Мари Элта — тытса чарнӑ. Вӑл тусӗ патӗнче пулнӑ. Судпа темиҫе хутчен те явап тытнӑскер айӑпне тунман.